Uhulumende uthi usezasebenzisa indlela ezehlukeneyo ukulondoloza amanzi elizweni ngesikhathi wona aselokhe encipha emadamu ngenxa yokungani kuhle kwezulu kubangelwa yisimo se El-Nino esesiphazamise eZimbabwe lasemhlabeni wonke jikelele.
Umphathintambo wezokulondolozwa kwemvelo, amanzi kanye lokuguquka komkhathi, unkosikazi Oppah Muchinguri utshele umhlangano lentathelizindaba ukuba, lelinyathelo liza ngemva kokuba uhulumende esithi usebubona ububi besimo ilizwe elikiso, esingesihle ikakhulu kwezokutholakala kwamanzi, amadamu elamanzi amalutshwana kakhulu ngemva kokungani kuhle kwezulu lonyaka ngenxa yodubo oselulethwe yikuguquka kumkhathi ngeyezi le El Nino.
Utshele lumhlangano njalo, owenzelwe emahofisini akhe,ukuba kunje inengi lamadamu lilesilinganiso esingaphansi kwamatshumi amahlanu ekhulwini-50%, samanzi, ikanti eminyakeni edlule bekumele ngaye esegcwele ngasikhathi sinye somnyaka.
Kodwa uzulu wemukela lumbiko ngendlela ezehlukeneyo, bekhona abalincomayo lelinyathelo, abanye kungabathi bekumele uhulumende ngaye uhlezi elungiselela sikhathi sonke hatshi ukugiji gijima udubo selungenile elizweni njengalokho osekusenziwa.
Unkosikazi Mary Mhlanga utshengise ukulujabulela kodwa elokuthikaza phezu kwendlela kuzalondolozwa ngayo lawo manzi.
Siyamethusa leso simo ilizwe selikuso unkosikazi Mhlanga ethi usethembele kuye uhulumende ukuba asize njengalokho okutshiwo nguNkosikazi Muchinguri.
Umnumzana Sineke Sibanda,ungubaba osesemutsha osole ukwenza kukahulumende,ukutatazela sekonakele,engazihluphi ukulungiselela indubo sikhathi sonke.
Uhulumende uthi sekudinga ukuba omanisipala bawalondoloze ngazo zonke indlela amanzi asemadamu abo. Uzulu laye ehlukane lomkhuba wokuwatshaphaza okubalisa ukuthelezela ngehose pipe, ehlukane lomkhuba wokugezela emabhavhini angendlini ama Bath Tubs, kanye lendawo zokubhukutsha ama swimming pools.
Abalimi bona bakhuthazwa ukusebenzisa indlela ezilondoloza amanzi ngesikhathi kusetshenziswa indlela zokulima ngokuthelezela.
Abikwa equbeka esoma kancane kancane, amanzi endaweni eziyisikhombisa zelizwe, lapho okutholakala khona amanzi kuma Catchment Areas abalisa e Runde, Save, Manyame, Mazowe, Sanyathi, Gwayi le Mzingwane.
Lesi simo kubikwa sibangelwa yikungani kuhle kwezulu kuminyaka emihlanu edluleyo kanye leyezi le El-Nino elivame ukuza lendlala embi.