Umka mongameli weZimbabwe, unkosikazi Grace Mugabe utshele abakade besemhlanganweni wakhe weMasvingo ukuthi okwakathesi akula muntu ongenelisa ukubusa ilizwe ngaphandle komkakhe. Wathi njalo lalapho engafuna ukusuka esihlalweni uzazikhethela umuntu afuna amelame ongaba languye.
Kumaviki ambalwa adluleyo uNkosikazi Mugabe ulandule ukuthi ufuna ukubusa ilizwe esithi soneso isikhundla sokukhokhela ugatsha lwabesifazana simenele.
Uphinde wathi uMongameli Mugabe lokhu esaqinile ukuqhubeka ebusa lanxa eseluphele esithi nxa kusitsho ukumthwala ngebhara esiwa embuthanweni yokukhankasa uzalifuqa lelobhara yena ngokwakhe.
Ukhuthaze uzulu obesemhlanganweni lo, weMasvingo ukuthi alime amabele afana lenyawuthi andadingi ukuthi izulu lize line lilinengi. Wengeze esithi uzulu engaboyamukela iziphiwo ezivela kunhlanganiso ezivela kwamanye amazwe esithi kumele abantu batshele lezonhlanganiso ukuthi zisuse izijeziso zenotho.
Umkamongameli ophe intathelizindaba ukudla ngeviki edluleyo, usole enye inkokheli athi ithenga intathelizindaba ngokudla lemali ukuthi zilobe okufunwa yizo.
Ukuhlaziya amazwi kaNkosikazi Mugabe umsakazo weStudio 7 uxoxe lelunga lexuku lePeople First, uMnumzana Max Mkandla othi akwenzayo lokhu kuveza sobala ukuthi yena ngokwakhe uyafuna laye ukubusa ilizwe lapho uMugabe esetshiya isikhundla.
“Imihlangano yonke ahamba eyenza elizweni lonke lakukhulumayo kule imihlangano, kuyayangisa okwamagama. Uphongu hamba ethethisa abantu abadala ekhuhluza inhlamba esabekayo, akulasithunzi akwenzayo njalo akula ncedo alupha abantu”, kutsho uMkandla.
Your browser doesn’t support HTML5
Umhlangano kamkamongameli uNkosikazi Grace Mugabe eMasvingo