Njengokuthembisa kwethu izolo, namuhla kuhlelo oluphathelane lezemaphandleni silethulela kabanzi udaba lomgobho okhitshwe ngabaprofethi besonto yeZion edamu leGaranyemba, eGwanda.
Bathwele 'umgobho' obanjwe edamu eGaranyemba ...
Izakhamizi zithi linyoka ibisiziqedele izifuyo njalo ibulala labantu.
Okwenzakale esigabeni seGaranyemba izolo kutshiye izakhamizi zikhuza umhlola zisithi lebhayisikopo yeNigeria isala phansi.
Besesiside isikhathi izakhamizi zikhala ngokufelwa yizihlobo mahlakaya lokuphunza kwezifuyo. Zithi besokugalule abantu abahlanu kulelidamu kusikhatshana esedluleyo ngendlela ezingacaciyo.
Ngumgobho lo na?
Zisuke zayabiza abaprofethi ababili uMehluli Moyo loThembani Moyo abangene edamu leGaranyemba bayibamba xhaka linyoka ngemva kokuyidinga okwamahola amathathu.
Bebesedlula amakhulu amathathu abantu ababuthane edamu leli ukuzebona izolo. Abanengi bajabulile ngokubona amaziyoni lawa ephuma emanzini eyithwele linyoka ilithanga njao ilamachatha amnyama.
Uqalekile umporofethi uThembani Moyo ...
Sixoxe lomunye ongathandanga ukwazakala ngegama olesihlobo esafela kulelidamu ngendlela engazwisekiyo.
USobhuku weGaranyemba uMnu. Jefry Dube uthe yena sephelelwe yisibaya sonke sembuzi ngalumgobho.
Abaprofethi laba baqale ukuzingela lumgobho ngeSonto kodwa behluleka ukuwubamba.Baphendukile njalo izolo bengasadlanga nkotshana bayiphuthuma ngehola lesine ntambama.
Kodwa lokhu akuzange kube lula nanku umprofethi Thembani Moyo eke waqaleka waze wafikelwa ngumoya.
Inyanga lazo bezikhona kudingwa umgobho eGaranyemba ...
Kuthe kusenjalo kwaqhamuka inyanga ezimbili, okungazange kwahamba kuhle amanye amazion. Omunye othe ulencwadi zezinatha njalo enguMaguranyanga uchothoze abesonto yeZion laba esithi benza ize.
Kube lokufuthelana okukhulu ke khonapho amaziyoni labosiyazi baphosa baphoselana izibhakela.
Omunye ongene emanzini obikwa eyisanuse uMnu Sizhozho uthe kazange wayibona inyoka edamu.
Utshaya uphondo ...
Abaprofethi beZion bayibambele khatshana linyoka phose phakathi laphakathi kwedamu lapho ababonakale sengathi kukhona abalwisana lakho ngemva kokuba baphume layo.
UMlisa uRoger Ndlovu ubuze izakhamizi ukuthi zingabe zibone kuhle na?
Abantu abalinde edamu bemelele ukuthi kukitshwa umgobho obathwalise nzima ...
Lanxa kunjalo bakhona abakhanye bengakholwa. Umfundisi Mesuli Nkomo uxwayise abazalwane ukuthi bavuse inkophe bengaze bathemba yonke into enzakalayo.
Kodwa umprofethi uMehluli Moyo uthe abayenzi masalamusi kodwa balwisana lobuthakathi.
Izakhamizi zeGaranyemba ezikhulume leStudio 7 namuhla zithe zilethemba soluphelile udubo lokugalula kwabantu lokuphunza kwezifuyo zayo.
Ukukhitshwa komgobho lo kulandela ukukhitshwa kukantikolotshi obesehluphile eCowdray kuliviki obikwa ebedlwengula abesifazana kanti njalo etshaya abantu ngamatshe ilanga libalele.
Your browser doesn’t support HTML5
Umgobho Utshiya Abantu Bekhuluma Ngokukhitshwa Kwawo Edamu
UMnu. Thandeko Zinti Mnkandla, ingcwethi kwezamasiko esintu, uthi amaporofethu la aqila abantu.
Your browser doesn’t support HTML5
'Akulamgobho Omncane Kangaka ...'