Umsekeli kameya wedolobho lakoBulawayo lokhansila babotshwe ngoLwesine kusihlwa bethwele inkulungwane ezingamatshumi amabili zamadollar eMelika – US$20,000 okuthiwa bayifumbathiswe yinkampani yakweleChina.
UNkosazana Simiso Mlevu, isikhulumeli sekomishini ekhangalane lobukhohlakalo eyeZimbabwe Anti-Corruption Commission, uthi uMnu. Edwin Ndlovu lokhansila Mpumelelo Moyo babanjwe xhaka bethwele imali le endlini kamamangala uNkosazana Tsitsi Mapfumo owenkampani yeLabenmon.
Uthi inkampani le yacela kukhansili ukunikwa indawo yokwakhe ifekithali yokuchola isamende edolobheni leli yathi isithole imvumo uNdlovu loMoyo balanda uNkosazana Mapfumo bacela imali yesibambiso besithi basebenza nzima ukuze ivunyelwe ukuba lendawo yokuqhuba ibhizimusi.
UNkosazana Mlevu uthi uMapfumo watshela amapholisa ngokwakucelwa ngababili laba abahamba endlini yakhe banikwa imali le ababethiywe ngayo.
Uthi okwamanje uNdlovu loMoyo bavalelwe enkambeni yamapholisa eMzilikazi Police Station njalo bazahanjiswa emthethwandaba ngoMgqibelo lapho abazakwetheswa khona icala lobukhohlakalo.
UMoyo ngumgcinisihlalo wekomithi yekhansili yakoBulawayo ebona ngokusetshenziswa kwemali yedolobho leli eyeFinance and Development Committee.
SEE ALSO:
Ingxoxo Esiyenze LoNkosazana Simiso Mlevu