Uvulwe ngokusemthethweni ngoLwesithathu mhlaka 23 Mpandula umdlalo walonyaka ka2015 owe Intwasa Arts Festival koBulawayo.
Isikhulumeli senhlanganiso eqoqa umdlalo we Intwasa Arts Festival koBulawayo uNkululeko Nkala uthi iqembu le Afrika Revenge yilo elithokozise uzulu obethe gwaqa egcekeni lezimota elingaphandle kwe Large City Hall umkhosi kungowokuvula okusemthethweni imidlalo yalonyaka eye Intwasa Arts Festival koBulawayo.
Umdlalo walonyaka uqale ngoMvulo lapho obekulenhlelo ezimbalwa ezigoqela ukubukiswa lokuthengiswa kwengwalo ezifundwa ngabafundi abazabhala imihloliso lonyaka.
UNkala uthi lezingwalo zithengiswe zaphela bacina befaka olunye uhlelo ukuze bangavaleli phandle ezinye izifundi ebezivela ngaphandle kwedolobho lako Bulawayo.
NgoLwesibili kubelohlelo lwabesifazane olubizwa ngokuthi Women, Wine and Words oluqhutshelwe eNational Art Gallery.
Inhlelo zemidlalo yeIntwasa Arts Festival koBulawayo ziqhutshelwa endaweni ezitshiyeneyo ezigoqela eLarge City Hall, eHope Centre, eBulawayo Theatre kanye lase National Art Gallery.
Lezinhlelo ziyatholakala ebulenjini ku www.intwasa.org kanye laku facebook ekhasini elithi Intwasa Arts Festival koBulawayo.
Abenza ezemidlalo abaphatheke kumdlalo walonyaka ngabagoqela imbongi zakuleli lezivela phandle kwelizwe, omahlekisa abalodumo koBulawayo lakweleZimbabwe jikelele, abaculayo labasinayo abagoqela iqembu le Ndolwane Super Sounds, IYASA, Diana Samkange, Impumelelo Shining Stars, uNdux Junior kanye lo Chase Skuza.
Lonyaka ngumnyaka wetshumi lanye limidlalo ye Intwasa Arts Festival koBulawayo isenziwa njalo eyalonyaka iyafika emaphethelweni ngoMgqibelo.
Your browser doesn’t support HTML5
Uvulwa okusemthethweni umkhosi weIntwasa Arts Festival