Kuhlelo lwamasiko lenhlakahle yabantu liviki sixoxa ngombukiso we Zimbabwe Carnival owenzelwe eHarare ngempelaviki lapho abanye abakade besola amantombazana abawathi abengagqokanga okufihla amabele lezinye izitho zomzimba ezihloniphekayo.
Abasola izembatho zamantombazana la bathi akumelanga ukuthi amantombazana akhuthazwe ukungagqoki okweneleyo loba nje kwesinye isikhathi bayabe besemdlalweni onjengowe carnival owenziwe ngempelaviki. Umdlalo lo ubuhlose ukuvuselela okungethekelelwa yizizalwane zamanye amazwe.
Kodwa-ke uMnu. Karikoga Kaseke umqondisi weZimbabwe Tourism Authority uthi umbikiso lo ngowokuthi abantu baphumuze ingqondo elizweni lapho abathwele khona nzima ngokuziphandela ukudla lokunye okufunekayo ngenxa yokudilika komnotho welizwe.
Kambe ukuvunula kwamantombazana la kwephula amasiko esintu na? Ukuze sihlaziye udaba lolu, iStudio 7 ixoxe loNkosazana Mpokiseng Sibanda isikhamuzi seNkayi loMnu. Thandeko Zinti Mnkandla ingcwethi kwezamasiko.
Bayavumelane bobabili ukuthi akumelanga amantombazana agqoke izembatho eziveza izitho ezihloniphekayo, ngoba kungasikho kwesiko labantu abadabuka eZimbabwe.
UMnkandla uthi "Okuyangisa kakhulu yikuthi kulabantu abakhulileyo abenza ubutshapha bonke lobu ngesikathi sikhuthaza ukuthi amantombazana labanye abasakhulayo bazibambe empilweni."
Lokhu kusekelwe nguNkosazana Sibanda othe abezifazane bajayele ukuzihlonipha nxa bemunyisa abantwana ngakho-ke "Kulihlazo ukuthi umuntu anqunule mahlayana nje. Umzimba womuntu uvele uyesabeka. Pho-ke abantu bayabe befuna ukubonani emuntwini onqunu ogida ezitaladini."
Your browser doesn’t support HTML5
Ingxoxo Esiyenze LoNkosazana Mokiseng Sibanda LoMnu. Thandeka Zinti Mnkandla