Kuhlelo Woza Friday liviki, silendlovukazi kwezomculo wengoma zomdumo wokholo, uQuincy Gqoka Moyo, yena osebenza ekoBulawayo.
UQuincy Gqoka uthe eqala nje ukucula umdumo wakhe wengoma zokholo wasuka wazithwala. Lokhu kwamnika umdladla wokusebenza ngamandla. UDabuka ‘komnyamubambile’, eNkayi.
Quincy Moyo
"Ngazalelwa eNkayi ngafunda eTsheli Primary ngafunda njalo eHlangabeza leNyanda Secondary School. Ngaqalisa ukucindezela idlalade lami lokuqala, ngaqalisa ukulicindezela ngo2001 ngaliphumisa ngo2004. Idlalade lenza kahle sibili langifaka lami ezingeni lami ngazizwa ukuthi, hayi, ngingumhlabeleli ngenxa kaMy Turn lanamhlanje uyadlala emoyeni abantu bayalithakazelela lelo dlalade."
Uyasebenza uMaMoyo njalo uhlezi ecindezela umculo wakhe ukuze ajabulise abalandeli bakhe.
“Ngilamadlalade amathathu. Elokuqala nguMy Turn, elesibili nguBeauty of Salvation elesithathu nguGrace Upon Grace. Ngisesemncane ngangijayele ukulalela ubaba uDerrick Nzimande, Thrombone Mpofu, uBrian Sibalo. Yibo abantu abangenz’ukuthi ngifune lami ukuthi ngicindezele owami umculo."
Ekukhuleni kwakhe uthi wafikelwa ngumcabango wokucula ingoma zokholo wahle wama ngazo.
uQuincy Moyo
"Ngikholelwa ukuthi ngilobizo lokuthi ngitshumayele ivangeli likaNkulunkulu lika Jesu, ngitshele abantu ngoJesu ukuthi babuye kuJesu Kristu isikhathi sisesekhona. Nxa ngithengisa umculo wami abantu bayawuthenga bayawuthakazelela. Mina olwami uhlupho ekade ngihlangana lalo luhlupho lokuswela imali lama resources okunjengama musical instruments. Abantu bayawuthakazela umculo wami kodwa ngenxa yokuthi angilamavideos bayabe bengakwazi ukuthi yimi engihlabelayo."
Umnandi umculo kaGqoka. Lizwi bani olitshiyela abalandeli bakho.
"Ngithanda ukubonga abasekeli ngosekelo lwabo kusukela ngiqala ukucindezela idlalade lami lokuqala. Kukhona okutsha okuzayo, ngisanda kuvela estudio ukuyocindezela idlade lami lesine. Umculo wami lingawuthola kumasocial platforms. Lingahamba kuYouTube lifike lidinge uQuincy Qgoka Moyo kumbe uQuincy Moyo lizawuthola umculo wami. Lingangithola njalo kunombolo ezithi 0775817657. Ngiyabonga.”