Owayengumdlali weqembu leHighlanders uMelusi Mabaleka Sibanda usenconywe ngemizamo yakhe eyokuthuthukisa umdlalo wenguqu edolobheni lako Bulawayo.
Ekhuluma ekupheleni komncintiswano walonyaka owe Mabaleka Under – 18 Tournament, obengumhlonitshwa uMama uCecilia Malunga utshayele ihlombe imuli yako Mabaleka ngokuzimisela kwayo ukuqoqa imidlalo yabasakhulayo.
UMalunga uthi akujwayelekanga ukuba omama besekele obaba nxa befaka imali zabo kwezemidlalo njengalokhu okwenziwa koMabaleka njalo uthi isifiso sakhe ngesokuba eminyakeni elandelayo ibe minengi imidlalo efanayo edolobheni lako Bulawayo.
Owayengumqeqetshi weqembu le Highlanders eminyakeni eyadlulayo uBarry Daka laye ungezelele emazwini kaMalunga wathi imisebenzi kaMabaleka iyaphathisa ukuthuthukisa umdlalo wenguqu kucele labasakhulayo njalo osowabo kumele benze imizamo efanayo.
Isiphathamandla senhlanganiso yeZifa edolobheni lako Bulawayo uWashington Sithole Chimhanda ukhuthaze amaqembu adlala kusigaba saphezulu ese Castle Premier Soccer League ukuba athaphe ithalenta emidlalweni efana lale ebiqoqwe ngumfokaMabaleka.
Umncintiswano weMabaleka Under-18 Tournament uqale nyakenye lapho okunqobe khona iqembu le Highlanders njalo ubungenwe ngamaqembu amane athi ele Chicken Inn, ele Emakhandeni, ele Bantu Rovers kanye lele Highlanders.
UMelusi Mabaleka Sibanda upha umvuzo unozinti weqembu leEmakhandeni uWadson Moyo
Lonyaka inkezo iphakamiswe liqembu le Emakhandeni lona elinqobe ele Highlanders kuFinal njalo umncintiswano walonyaka ubungenwe ngamaqembu ayithoba minwe mbili.