Uzulu weZimbabwe ukhuthazwa ukuba abe lesineke ekubukeni amasiko lemikhuba yabamanye amazwe okufana lele Brazil lona elikhangelelwe ukuza embukisweni wesithathu we Harare International Carnival.
Lumbukiso oqale ngoMgqibelo mhlaka 5 Mpandula, ukhangelelwe ukuphela mhla ka 10 ngenyanga ezayo kaMfumfu.
Umphathintambo wezokwethekelwa kwelizwe, uMnu. Walter Muzembi utsho linkuthazo ngemva komkhosi wokuphawulwa kwalombukiso we Carnival, oqoqwe luhlangothi lokukhankasela ezokwethekelelana olwe Zimbabwe Tourism Authority – ZTA lumanyene lomanisipala weHarare.
Ukhuthaza njalo uzulu, uMzembi ukuba azame ukuzwisisa inhloso yalimbukiso yama Carnival ukuba ngeyokubonisa amasiko lemikhuba yabantu bemazweni ehlukeneyo.
Ngakhoke banxusiwe embukisweni walonyaka abe Brazil laba kanye labazavela kwamanye amazwe edlula alitshumi lanhlanu agoqela ele Democratic Republic of Congo, Malawi Egypt, Nigeria United Kingdom lamanye.
Kodwa uzulu weHarare, okubalisa umnumzana Silindile Ngwenya wase Highfields,utshengise ukukhathazeka ngalenkulumo kamphathintambo.
Lalokho okutshiwoyo,ukuba bekhona abenza okufanayo kuleli, ukudhansa bembethe impahla yangasese kuphela, uNgwenya uthi kuyikuqholoza ngoba abenza lokho bekwenza kundawo ezibalulekileyo, okufana le ma night clubs hatshi lapho babonwa nguzulu wonke okubalisa llabantwana.
Kunengi okuqoqiweyo ukujabulisa uzulu kulumbukiso oqhutshwa phansi kwendikimba ethi “ Yesterday,Today and Tomorrow ”, eHarare, kusukela mhlaka 5 Mpandula kusiyafika umhlaka 10 Mfumfu.
Abazalibazisa uzulu laba babalisa abaculi be Jazz abavela emazweni anjenge Kenya, South Africa, Nigeria, Malawi lamanye, bezakhokhelwa ngumculi wezimbabwe odumileyo uOliver Mtukudzi.
Bakhangelelwe ukwedlula inani lanyakenye, labeza emkhosini walonyaka lisuka kwabafika phose izigidi ezimbili kusiya kuzigidi ezimbili lengxenye lonyaka.