UMongameli Mokgweetsi Masisi osenqotshwe kukhetho lokudinga uhulumende omutsha kweleBotswana uthi kaboni ukuthi ukunqotshwa kwakhe kudalwe yibudlelwano alabo loMongameli Emmerson Mnangagwa.
UMasisi kazisoli ngokuthi uzwana kakhulu loMnangagwa.
UMasisi utshele intathelizindaba eGaborone ngoLwesihlanu ukuthi uMnangagwa kalani lokunqotshwa kwebandla lakhe eleBotswana Democratic Party ngumanyano weUmbrella for Democratic Change, okhokhelwa nguMnu. Duma Boko.
“Ubudlelwano engilabo loMnangagwa buyafana lengilabo labanye omongameli bamazwe angomakhelwane. Busegcekeni. Bugxile endabeni ezifana lezomvikela kanye leminye imthetho yamazwe.”
UMasisi uthi kesabi ukuthi umbuso omutsha ongaphansi kwebandla leUmbrella for Democratic Change ungamthonisisa uma kulamacala awadale engumongameli. Uthi ukhetho oluqhutshwe ngoLwesithathu belukhululekile hatshi lokhu okukhulunywa ngabanye abantu.
“Kulokho okukuthi sasifuna ukusebenza leZimbabwe ukuqila kukhetho, yikuhutsha nje. Inhlamba yokuthi inhlanganiso eqhuba ukhetho eye IEC yahamba yaya thapha umbono eZimbabwe ukuze iqile, ngibona lawe uzibonele ukuthi ukhetho lwethu siluqhube njani.”
“Kulokho okukuthi sasifuna ukusebenza leZimbabwe ukuqila kukhetho, yikuhutsha nje. Inhlamba yokuthi inhlanganiso eqhuba ukhetho eye IEC yahamba yaya thapha umbono eZimbabwe ukuze iqile, ngibona lawe uzibonele ukuthi ukhetho lwethu siluqhube njani.”
Omelele ukungena esikhundleni sikamongameli, uMnunzana Duma Boko, yena oligqwetha elilwela amalungelo oluntu, uthi uyabonga ukuthi uMasisi uvumile ukusuka embusqeni ngokuthula.
Okwenzakale lamuhla kufaka umbuso wethu wabantu ngabantu kwelinye izinga. Sibone ukuntshintsha kombuso okulokuthula uzulu wonke ebhekile.
Ukungena kombuso weUDC sekudale ukungahlaliseki kwabokuza abagoqela abeZimbabwe besithi abazi ukuthi umthetho webandla leli ngabokuza uthini. Kodwa uMnunzana Stanley Ncube odabuka eZimbabwe ohlala kweleBotswana, uthi kasiboni isizatho sokwethuka ngoba iUDC yayisilwa phezu kwembiko yokuthi eleZimbabwe lifuna ukuncedisa iBDP ukuqila kukhetho.
“I-UDC kade isilwa ngodaba lokuqila kwekhetho yiZEC hatshi ukulwa labantu beZimbabwe. Angiboni ukuthi abantu beZimbabwe abalapha kumele bethuke ikakhulu uma behleli belandela imthetho yelizwe."
Kukhetho oluqhutshwe ngoLwesithathu ibandla leUDC lithole amavoti angamatshumi amathathu lasithupha, kukanti elenye eliphikisayo eleBotswana Congress Party kade lilezihlalo ezilitshumi lanye, lilandelwa ngele Botswana Patriotic Front elithole ezinhlanu. Ngesikhathi sokuya emoyeni, bekusele ukuthi kubalwe amavoti endaweni ezinthathu.
Liyakuphika ibandla leZanu PF ukuthi lazame ukungenela kukhetho lweBotswana. Isikhulumi sebandla leli, uMnunzana Farai Maparira, utshele iStudio7 ukuthi akulalapho ibandla lakhe elingena khona, kodwa kuhle ukuthi intando yabantu ifeziwe kweleBotswana.
Kwaba lokwethuka okufanayo kwabeZimbabwe kweleSouth Africa ngesikhathi kusiba lohulumende womnyano ekuqaleni komnyaka. UMnunzana Ngqabutho Mabhena ongumgcinisihlalo weZimbabwe Community in South Africa uthi akwaziwa ukuthi iUDC izaphatha njani abokuza.