Umkhokheli womanyano wamabandla aphikisayo oweMovement for Democratic Change Alliance, uMnu. Nelson Chamisa, usekhweze emthethwandaba weConstitutional Court udaba lwempumela yokhetho lukamongameli olusanda kwenziwa kwele Zimbabwe.
Ikhomishini yeZimbabwe Electoral Commission (ZEC) yathi uMnu. Emmerson Mnangagwa nguye owanqoba kukhetho lolu.
Lokhu kuphikiswa ngumanyano weMDC Alliance othi iZEC yaphekapheka impumela le isenzela ukuthi uMnangagwa anqoba kukhetho lolu.
Omunye wabamele umanyano lo, uAdvocate Thabani Mpofu, uthi bafisa ukuthi umthethwandaba uguqule impumela le wenze isinqumo sokutho owanqobayo nguMnu. Nelson Chamisa, okhokhela iMDC Alliance.
UMpofu uthi balobufakazi obumangalisayo obuveza ukuthi ukhetho lolu kaluqhutshwanga ngemfanelo.
Uncedisana lamanye amagqwetha avele kwamanye anjengo Dali Mpofu okubandla leEconomic Freedom Fighters loAdvocate Tembeka Ngcukaitobi abakwele South Africa, omunye odabuka kwele Melika kanye labanye abambalwa abadabuka eZimbabwe.
Kodwa-ke uMnu. Paul Magwana webandla leZanu PF uthi umanyano lo kawusoze uphumelele emthethwandaba ngoba uMnangagwa wanqoba kukhetho lolu.
Kusenjalo, uMnu. Ziyambi Ziyambi, umphathintambo wezemithetho kuhulumende weZimbabwe, uthi okwenziwe nguChamisa kutsho ukuthi umkhosi wokugcoba uMnangagwa ngeSonto kawusoze wenziwe.
Your browser doesn’t support HTML5
Udaba Esilethulelwe NguMavis Gama