Izakhamizi zeHarare zikhuthaza umasipala ukuthatha amanyathelo okuzivikela kumonakalo ongadalwa ngamanzi ngemva kokuna kwezulu elinengi ngokulungisisa imigelo yamanzi ukuba engangeni ezindlini zabo.
Izakhamizi ezinengi zemzini we Mbare zithi sezilesikhathi eside zibhekana lobunzima bokwandelwa ngamanzi acina engena ezindlini imigelo isehluleka ukuwathwala kakuhle ukuze agelezele emadamu bethi bacina belahlekelwa yikudla, imibeda lama sofa ngoba sokonakele bengelancedo abalutholayo.
Umnumzana John Dube ohlala emzini we Epworth obelenkinga yempopoma zamanzi zadiliza lezinye zezindlu uthi kasakhangeleli ukuba umasipala le Board kungabaphathisa kuloludaba ngendlela izinto ezimi ngayo.
Esinye isakhamuzi se Harare esilwela amalungelo ezisebenzi umnumzana Guchutu uthi sokudingakala ukuba umasipala ahlale elungele umonakalo onje ngokulungisisa imigelo yamanzi isikhathi sokuna kwezulu singakafiki.
Umqondisi wenhlanganiso yezakhamizi zeHarare eye Combined Harare Residents Association, umnumzana Mfundo Mlilo uthi izulu lihlasele indawo ezitshiyeneyo zedolobho leli ezigoqela imizi ebalisa eMbare, Chitungwiza, Epworth, phakathi kwedolobho, Manyame lezinye ethi udubo lukhanya kuyikusilela kwemali.
Izisebenzi zekhansili zibonakala lapha lalaphaya zigebha ngenjongo yokulungisisa imigelo yamanzi ngesikhathi izakhamizi zisithi seziphuzile ngoba izulu selone okunengi njalo Isikhathi salo singakapheli.
Imizamo yokuthola icele lika masipala ayiphumelelanga ngoba isikhulumeli sakhe umnumzana Chideme engabambeki ecingweni loba kumakhalekhukhwini.