Kambe bazathola yini imendulo abafana ababili abamele eleZimbabwe kumncintiswano wokugijima owe-200 metres ozaqhutshwa namhla ntambama kumidlalo yeOlympics eqhutshelwa kwele France.
UTapiwanashe Makarawu loMakanakaishe Charamba balobe kakutsha imbali yomdlalo wokugijima eyelizwe leZimbabwe ngokufinyelela ku-final eyomncintiswano we200 metres kumidlalo yeOlympics izolo ntambama.
Owake wasebenza eyintathelizindaba yezemidlalo uThandiwe Moyo uthi ufisela ababili laba inhlanhla enkulu emkhankasweni wabo wokuthola imendulo.
“Benze kuhle kakhulu njalo sikhangelele ukuthi mhlawumbe sesingathola imendulo kibo bobabili. Eminyakeni eyedluleyo sike saba laye uBrian Dzingai laye oke wafinyelela kufinal kodwa khathesi sikhangelele ukuthi lathi singathola imendulo sijabule kakhulu sindawonye labo ngoba bayenze kuhle kakhulu.”
Intathelizindaba yezemidlalo uPraise Dlakama uthi yena akusoze kube lula ukuba bathole imendulo abadlali laba nxa ekhangela indlela abagijime ngayo kusemi-final.
“Izikhathi zabo ngilensolo lazo ngoba baphutshe besendaweni yesithathu kumijaho abaphatheke kuyo nxa kuqathaniswa lezikhathi zalabo abaphutshe besendaweni yakuqala. Ngalokho ke kungaba nzima kubo kodwa kungasenani lokhu abakwenzileyo kuhle njalo okungijabulisayo yikuba uBrian Dzingai nguye obancedisayo. Lokhu kutsho ukuba singaya khatshana nxa singasebenzisa abantu abake baphatheka kwezemidlalo kuzinga laphezulu ukuphathisa laba abadlala khathesi.”
Olandela ezemidlalo uMunyaradzi Mabigana uthi sekungenzakala loba yini ku-final kodwa umdlalo wokugijima usungaphakama ngemva kwemidlalo yeOlympics.
“UMakarawu loCharamba bazenzile izinto, kuhle lokhu kuyabongeka. Labasakhulayo labo nxa bebona kunje bayaqala ukukholwa ukuba labo bengaphumelela. Basimele kuhle njengelizwe njalo lokhu kutshengisa ukuba ezemidlalo kumele ziqakathekiswe amaqembu aphathiswe ukuze kumidlalo ezayo sibe labadlali abanengi abancintisayo.”
UDumisani Luzulani Dube, ohlala eNyamandlovu, uthi bengaba banengi abenza izimanga kwezemidlalo nxa amathuba engaphiwa labantwana abasemaphandleni.
“Lapha emakhaya abadala labantwana sebedinga ukuthi bathole ukudla, isikhathi esokuthi umntwana etshone egijima kumbe alandele ithalenta lakhe asikho. Laba bafike lapho abakhona ngoba bayathola. Lapha eNyamandlovu bakhona oFish abakade begijima kakhulu kodwa ngesizatho esokuthi ukuntu akatholi uyacina esiyadinga umsebenzi etshiyana lezemidlalo.”
UMakarawu loCharamba bayingxenye yabadlali abayithoba minwe mbili abafinyelele ku-final njalo laba bagoqela intshantshu zaseMelika uNoah Lyles kanye loErriyon Knighton bona abakhangelelwe ngabanengi ukuthi benganqoba ndawonye loLetsile Tebogo owakwele Botswana. UMakarawu loCharamba bafunda emakolitshini eMelika.