Umkhokheli webandla le National Constitutional Assembly (NCA) uMnu. Lovemore Madhuku ongomunye wabanikwa imotha phansi komanyano owe Political Actors Dialogue(POLAD) uncoma ukubunjwa kwalu manyano, esithi lokho okwenzakala phansi kwawo kumele kuqhubeke ezigabeni zonke zelizwe lasemazweni adlelana le Zimbabwe.
I-POLAD) ngumanyano owabunjwa nguMongameli Emmerson Mnangagwa ngemva kokhetho luka 2018 lapho anxusa khona abamabandla aphikisayo esithi ufuna ukuthi basebenzisane laye ukuthuthukisa ilizwe. Kodwa ibandla elikhulu eliphikisayo ele MDC Alliance elikhokhelwa ngu Mnu Nelson Chamisa layala ukuba yingxenye yalumanyano lisithi akala njongo enhle ngalumanyano.
Umnumzana Lovemore Madhuku.lemotha ayiphiwa kumanyano wePOLAD
Ekhuluma le ntathelizindaba eHarare ngoLwesibili, uMadhuku uveze ukuba idale lePOLAD kumele liqhubeke liphiwa usekelo ngoba lisenza umsebenzi omkhulu.
Usole kakhulu abantu abathi uMnangagwa usebhadala amabandla akuPOLAD ngokubapha izimota ukuze bangaphikisani lohulumende.
“Bengifuna ukuchasisa ukuba sikholwa ku POLAD. IPOLAD yinto enhle elizweni. Kumele sonke sibekwazi ukuba iPOLAD ilungele ilizwe. Labo abanqobayo kumele basebenze lalabo abanqotshwayo”
Lokhu kusekelwe ngumsekeli we bandla le NCA uNkosikazi Hingani Mnkandla.
“Senze into elungileyo ngoba iPOLAD inhlanganisa abantu ndawonye. Labo abanqobayo lalabo abanqotshwayo. Abanqotshwayo labo balemibono ngoba bayabe befuna ukungena esikhundleni”
UNkosikazi Mnkandla uqhubeke esithi ukuthatha okwenziwa izimota ngamabandla aphansi kwe POLAD kwenzelwa ukuba bahambise ilizwi lokuqakatheka kwaleli qula.
“Kumele sisebenze bekusiba nzima ukuba sisebenze sisenza umsebenzi we POLAD. Bekunzima ukuba sifike emakhaya, khathesi sesizakuya endaweni ezinengi zelizwe sisazisa abantu ukuba iPOLAD iyini”
Kodwa ingcitshi kwezombusazwe uMnu Pride Mkono uthi uMadhuku utshengise ukuba kalandaba lozulu ngokuthatha imota ze POLAD ngesikhathi uzulu esidla inggweqwe zo mlomo.
“Ukuthatha kuka Madhuku imota yinto enziwa ngabezombusazwe kwele Zimbabwe. Izibhedlela kazilalutho, abantwana bayehlukela ukuya ezikolo. Inkokheli le ivele kayilandaba labantu”
Ingcwethi ezicubungula ezombusazwe ziyayisola inkokheli zamabandla amancane aphikisayo eyavuma ukungena kumanyano wePOLAD zisithi lokhu kuzakwenza behluleke ukuphikisana loMnangagwa loba ukumsola lapho umbuso wakhe uphosisa loba esephula amalungelo oluntu, okugoqela ukwehluleka kwakhe ukujezisa iziphathamandla zikahulumende wakhe ezidala amacala enkohlakalo eyiyo esidilizwe umnotho welizwe.