Umuyi uLucy Yasini, owayeyintathelizindaba yeStudio 7, ngoLwesithathu kusihlwa uphiwe isicoco sokulwela ilungelo loluntu yinhlanganiso yeAmnesty International ethi wayelesibindi sokukhathalela abantu beZimbabwe.
Ngesikhathi enikwa isicoco lesi, intathelizindaba zikhale ngokuthi kazisebenzi ngemfanelo elizweni.
UYasini owasebenza okweminyaka edlula amatshumi amathathu - 30 emsakazweni weZimbabwe Broadcasting Coorperation, SABC Channel Africa lakuStudio 7, uchazwe njengomuntu owasebenzisa imisakazo, ikakhulu oweStudio 7, ukuveza iqiniso ngokukhahlanyezwa kwabantu eZimbabwe nguhulumende.
Ekhuluma emkhosini lo lapho okuphiwe khona izicoco ezitshiyeneyo intathelizindaba eziloba ngamalungelo oluntu, obemele inhlanganiso yeAmnesty International, uNkosazana Zandile Ndlovu, uthe uYasini waqhuba kuhle umsebenzi wakhe esaphila.
Umuyi uLucy Yasini, owayeyintathelizindaba yeStudio 7, uphiwe isicoco sokulwela ilungelo loluntu yinhlanganiso yeAmnesty International ethi wayelesibindi sokukhathalela abantu beZimbabwe.
“Silapha ukunikeza inhlonipho ku Lucy owasitshiya lonyaka ube eyimbokodo kithi ngoba ubeqine ukumela amalungelo abantu. Wayelesipho sokukhuluma indimi ezinengi njalo ekhuluma iqinise engesabi. Yikho iAmnesty International ikubone kfanele ukuba ilanga lanamhlanje sili dedicate kuye,’’ kutsho uMaNdlovu.
UYasini watshaywa ngamapholisa ngomnyaka ka2016 ngesikhathi eloba udaba lokutshengisela kwamalunga ebandla leMovement for Democratic Change eHarare. Intathelizindaba ezinengi zithi wayelesibindi njalo elwela ilungelo loluntu ngokuloba izindaba ezinengi ezimayelana lokukhahlanyezwa kukazulu. Omunye wabancoma umsebenzi wakhe nguLeopold Munhende osebenza ezimele.
“Udadewethu uLucy wasifundisa umsebenzi iakhuu njengantatheli ezisathuthukayo. Isicoco lesi sifundisa ukuba hayi umuntu owenza okuhle ungaze usuke emhlabeni kawikhohlwa ngabantu. Kuyathokozisa lokhu,’’ kugcizelela uMunhende.
Umdeni kaYasini wamukele isicoco lesi ngenjabulo. Umnewabo uMnu. Charles Yasini ukhulume emkhosini lo emele umdeni kamuyi.
“Njengemuli isicoco lesi sitsho okunengi kakhulu kithi ngoba wayengumuntu uwayethanda umsebeni wakhe njalo engesabii lutho,’’ kutsho uYasini.
UYasini, owathathwa yisifo semvukuzane njalo owabhubhela esibhedlela seSt. Annes Hospital eHarare, uhlonitshwa ngeleMelika lamanye amazwe athi wayezimisele ukulwela ilungelo loluntu.
Kusenjalo, intathelizindaba ezikhulume embuthanweni lo izolo zithi sibi kakhulu isimo sentathelizindaba eZimbabwe ngenxa yeholo eliphansi njalo langokungadlelani kuhle lohulumende. Ezinye intathelizindaba zithi sezihlale inyanga ezifika isithupha zingaholi ngoba amankampani ehluleka ukwenza imali.
Eyinye yentathelizindaba ezikhulume emhlanganweni lo nguEvans Mathanda owephephandaba leNewsDay.
“Isimo sibi kakhulu kuntathelizi kwele Zimbabwe ngoba akula mali yokuhola. Amankampani amanengi kaselamali zokubhadala ama adverts osekwenza ukuba kube nzima ukwenza umhlangano wethu,’’ kutsho uMathanda.
Amazwi la asekelwe nguMnu. Njabulo Ncube owenhlanganiso yeZimbabwe National Editors Forum yena othe lobanje isimo sokuhlukuluzwa nguhulumende sesingcono, sekusele isimo somnotho sona athi simi manzonzo.
“Kudala sasikhala kakhulu ngesimo sokwethuselwa sona esesingcono kodwa umnotho yiwo othwalise intatheli amagamba avuzayo. Kumele kube lendlela zokuvuselela iholo lentatheli ngoba lokhu sekubulele isimo somsebenzi wabo,’’ kugcizelela uNcube.
Kodwa osebenza kugatsha lukahulumende lokukhitshwa kwemibiko uMnu. Methuseli Dube uthi uhulumende uyazazi zonke inhlupho zentathelizindaba.
“Uhulumende uzama ngazo zonke indlela ukuba asekele umsebenzi wentatheli ikakhulu ezisathuthukayo. Konke okwenzakalayo eZimbabwe kuyenzakala kwamanye amazwe kodwa uhulumende uzakulungisa,’’ kutsho uDube.
Abanye abathole izicoco nguBlessed Mhlanga osebenza kuHeart and Soul TV onikwe isisoco sokuloba izindaba zokutshaywa kwabantu eZimbabwe; iBusStopTV okuthiwa yenze kahle ebulenjini beInternet; uEdgar Gweshe owephephandaba leNewsDay onikwe isicoco sokuloba ngokwakhiwa kwezindlu endaweni ezilamanzi agcinwe okusemthethweni eZimbabwe, uMichelle Gahadza oweTall Grass Media oloba ngezabomama, labanye abambalwa.
SEE ALSO:
Udaba Esilwethulelwe NguMlondolozi Ndlovu