Ikhansili yeHarare ithi isisungule imizamo yokvuselela ukwakhiwa kwesithombe sikamuyi owayengumsekeli kamongameli uMnu. Joshua Mqabuko Nkomo eAfrica Unity Square, ngemva kwemizamo efanayo eyehlulayo ngeminyaka edluleyo.
Abalwela ilungelo loluntu kanye leziphathamandla zamabandla ezombusazwe basola imizamo yokwakha isithombe lesi eKarigamombe Building eHarare besithi kutshengisa ukungahloniphi imuli kamuyi kanye labantu besigabeni seMatabeleland ngoba lindawo iphathelane lokuhlukuluzwa kwabo.
Eminye imizamo yokwakha lesi isithombe emgwaqweni weJulius Nyerere Street eHarare yehlula ngomnyaka ka 2010. Isithombe lesi size sakhiwa koBulawayo ngomnyaka ka 2013.
Onguye osungule loludaba kukhansili yeHarare ngukhansila we Glenview uMnu. Tungamirai Madzokere, ogcizelele ukuthi imisebenzi kamuyi iyancomeka ngakho kufanele isithombe sakhe sakhiwe kulelidolobho njengendlela yokumhlonipha.
Ukuze sizwe okunengi ngaloludaba, uSithandekile Mhlanga weStudio 7 uxoxe lokhansila Peter Moyo we Southerton eHarare, ovumelane lokhansila Madzokere.