Uhlangothi lukahulumende olulawula umsebenzi wamanzi, olweZimbabwe National Water Authority lubike ukuba umsebenzi wokwakha idamu leGwayi- Shangani uqhubeka kakuhle.
Lokhu kuphume emhlanganweni oqoqwe nguManisiphala izolo, owe Bulawayo City Council Water lndaba wokuhlaziya udubo lwamanzi kuleli dolobho.
AbeZINWA bahle bathatha ithuba lokwazisa abakade besemhlanganweni lo, ukuba sebeqalile ukuhlola ingwalo zabakhangelelwe ukuqhuba umsebenzi wokufaka impompi zokudonsa amanzi esuka edamu leGwayi-Shangani esiwa koBulawayo njalo ukhangelelwe ukugqitshwa ngomnyaka ozayo.
U-Manjinela Paul Dengu weZINWA oqondisa ngokwakhiwa kwedamu lelii uthi idamu yebo liyakhiwa kodwa udubo lwemali lobhubhane lweCovid-19 luphazamise kakhulu umsebenzi lo.
"Idamu liphakathi kokwakhiwa okwamanje sesiku59 percent, siphakathi kokuhlola amatender papers angu18 ukuze siphume labantu abazakwakha impompi ezidonsa amanzi esuka edamu esiza koBulawayo njalo umsebenzi wokwakha idamu ukhangelele ukuphela kumnyaka ozayo."
Evula umhlangano lo, owe Indaba izolo, umphathintambo wendaba zakoBulawayo uNkosikazi Judith Ncube uthi udubo lwamanzi luyaphambili edolobheni leli njalo ukhathazekile okuqhamuka kwesihudo kuleli dolobho.
"Savumelana ukuba singahlaleli umsebenzi ngesikhathi size sibelodubo lwesihudo eLuveve, ngilusizi ngokulahleka njalo komphefumulo eTshabalala ngenxa yesihudo esesithe saqhamuka njalo."
Umgcinisihlalo weBulawayo Progrssive Residents Association, uMnu Ben Moyo uthi kuhle ukuba idamu leGwayi-Shangani seliseduze lokuphela ukwakhiwa.
"Kungumsebenzi omuhle ukuba sekuseduze ukuba ukwakhiwa kwedamu leGwayi-Shangani kuphele idolobho lithole amanzi kodwa thina njengezakhamizi sikhangelele ukuba kwakhiwe idamu khonapha koBulawayo ukuze udubo lwamanzi luphele."
UMsekeli kaMayor, uKhansila Mlandu Ncube uthi bacela uhulumende ukuba ayakhe masinya isithitshi sokuhlambulula amanzi ukuze ngomnyaka ozayo kubelesiqiniseko sokuba idolobho lizathola amanzi.
"Sicela ukuba uhulumende ancede kakhulu edabeni lokutholisa idolobho amanzi njalo basakhele indlu yokuhlambulula amanzi azasuka eGwayi-Shangani ukuze udubo lokusilela kwamanzi luphele edolobheni."
Isakhamuzi sakoBulawayo, uMnu Lucky Tshuma uthi kuzindaba ezinhle ukugqitshwa kokwakhiwa kwedamu leli.
"Silokuthokoza kakhulu ukuthi idamu leGwayi-Shangani selizaphela ngoba udubo lwamanzi luphambili esithanda ukubakwazi yikuthi imitshina yokugezisa amanziukuthi afike koBulawayo uzofakwa nini."
Umhlangano lo, oqoqwe ngumanisiphala wako Bulawayo, izolo ngeminye yemizamo yakhe ejonge ukudinga amacebo wokuqeda udubo lwamanzi kuleli dolobho kanye lelokuhamba kwamandla kagetsi.
Umabhalane wekhansili, umnumzana Christopher Dube ucele abohlangothi lweZINWA ukuba babeyingxenye yomsebenzi wokwakhiwa kwesithitshi sokuhlambulula amanzi kuleli damu. Emhlanganweni lo kuvele njalo ukuba ikhansili lenkampani etholisa amandla kagesti eze ZESA balenhlupho ezithile ababhekane lazo ekutholiseni uzulu amanzi logetsi sikhathi sonke.
U Bulawayo uphakathi kodubo lokuvalelwa kwezakhamizi amanzi okwesikhathi eside osekubangele ukuqhamuka kwesihudo esesithethe umphefumulo womuntu oyedwa sikhuluma kanje emzini owe Tshabalala.