Amalunga enhlanganiso zenkolo, abenhlanganiso zikazulu, abamabandla ezombusazwe kanye lezisebenzi, bonke bafolile bayafika emahofisini kamongameli Jacob Zuma ePitori besithi akathathe amanyathelo ngalabo abatshontsha imali kazulu bezidlela.
Abebetshengisela laba abafika izinkulungwane ezintathu bafolile belubhekise e Union Buildings, lobanje leli bekulinani elincane kakhulu nxa kuqathaniswa lezinkulungwane ezilikhulu ebezikhangelelwe ngabaqoqe lokhu kutshengisela.
Isizalwane seZimbabwe umnumnzana Godfrey Phiri, olilunga le nhlanganiso ye Right to Know kweleSouth Africa abuye njalo abe ngomunye wabaqoqe ukutshengisela lokhu, uthi labo njengezizalwane zeZimbbwe umkhuba wokufumbathisa lenkohlakalo ubathwalise nzima. Uthi inengi labeZimbabwe ikakhulu abangalamaphepha okuhlala elizweni babhadala amapholisa nsuku zonke ukuze bengabotshwa. Uthi abanye babhadaliswa ukuthola imisebenzi kanti lokuthi umuntu elatshwe esibhedlela kucina sekuthiwa abhadale eyesifumbathiso.
Akasakhulumike ngohlelo lokuthola amaphepha okuhlala elizweni lona athi kulokho inkohlakalo isifana lengwe ezalele endlini.
Izizalwane zakweleSouth Africa lazo abeziyingxenye yalo umkhankaso, zithi zithwele amagabha avuzayo. Zithi ukutshontshwa kwemali yomphakathi yizisebenzi zikahulumende yikho okwenza behluleke ukuthola izindlu zokuhlala, ezempilakahle kanye lemisebenzi.
Inhlanganiso yabahlola ngokusetshensiswa kwemali kweleSouth Africa ithi eminyakeni emibili edluleyo ilizwe lilahlekelwe ngamabillion angamakhulu ayisikhombisa amarandi (R700 billion) ngenxa yenkohlakalo lobusela.
Unkosazana Portia Serote olilunga lenhlanganiso elwela amalungelo alabo abaphila legciwane le HIV, eye Treatment Action Campaign, uthi bafuna uhulumende kamongameli Zuma abophe bonke abadala inkohlakalo lokuntshotsha imali yenhlelo zomphakathi.
Inengi labebetshengisela laba kugoqela labeZimbabwe bebevungama besithi phansi ngobusela lokuhlawuliswa kwabantu imali yesifumbathiso. Abanyeke ngabakade betshaya ingungu besithi baxotsha idimoni lobusela.
Omunye wabaqoqe ukutshengisela lokhu umnumnzana Trevor Ngwane owenhlanganiso ye United Front, uthi kabakhathazekanga ngenani elincane labantu abebetshengisela njengoba libangelwe yikuthi inhlanganiso yabaqatshi yalile ukupha izisebenzi imvumo yokubayingxenye yokutshengisela lokhu.
Kusenjalo uhulumende ulwemukele ugwalo lwezikhalazo zabebetshengisela wathembisa ukuthi zizakhangelisiswa lobanje inengi belimhoza umphathintambo owemukele lolugwalo.
Umnumnzana Ngwane uthi mhlaka 14 wenyanga ezayo baqoqa ukutshengisela okufanayo, lapho athi into yonke elizweni izakuma khwimilili.
Your browser doesn’t support HTML5
Abantu abatshengisele besola udubo lokufumbathiswa kwele South Africa