Amalunga edale lephalamende aqalise ngoMvulo ukucwayisisa ngodlakela olubekhona kulelidale ngoMgqibelo lapho abasekeli beZanu PF abatshaye khona amalunga alelidale kanye lentathelizindaba.
UMeli weHwange Central njalo elilunga leMDC ekhokhelwa nguMnu Morgan Tsvangirai, uMnu Brian Tshuma ngomunye wabalimelayo kulesisehlakalo wathathelwa imali lomakhalekhukwini wakhe.
Abasekeli beZanu PF laba babikwa behlukuluze njalo umeli weMakonde ephalamende uRisipa Kapesa oweZanu PF, kodwa bathi ngokunanzelela ukuba ungomunye wabo, bamekela.
Amalunga ephalamende akuThematic Committee on Human Rights kanye laweJustice and Legal Affairs Committee awedale lephalamende ehluza udaba lokuthi uzulu ufuna iHuman Rights Commission isebenze njani.
Umlawuli wedale uMnu Lovemore Moyo ubikwa enze imihlangano lomabhalane walelidale uMnu Austine Zvoma ngoMvulo, amapholisa lamaCIO bekhulumisana ngaloludaba.
Lanxa amapholisa ayekhona udlakela lolu lusenzakala, akulamuntu owabotshwayo.
Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthe kulihlazo kakhulu okwenzakeleyo, esithi bafuna labo abeza lesisiga babotshwe.
Amazwi kaDube agcizelelwe ngumsekeli wesikhulumeli seMDC ekhokhelwa nguMnu Morgan Tsvangirai, uNkosazana Thabitha Khumalo.