Uhulumende kanye labaphatheka kwezokulondolozwa kwezemvelo bavumelana ekuthini kubekwe imithetho ezaphathisa abezomthetho ukuba banikeze izigwebo ezilukhuni kulabo abatholakala belamacala wokutshisa amagusu mahlayana ngendlela yokwehlisa loludubo lokulumathisa umlilo.
Umphathintambo wezokulondolozwa kwezemvelo, uNkosikazi Oppah Muchinguri uveze lokhu emhlanganweni lentathelizindaba kuvezwa ikhomidhi ( National Fire Committee ),ezakuqhuba imikhankaso yokufundisa uzulu ngokuqakatheka kokwenqabela kokulumathisa umililo mahlayana, ilizwe selingene kusikhathi lapho imililo eyandise ukuqhambaka kakhulu.
Emhlanganweni owenzelwe emahofisini kaNkosikazi Muchinguri eHarare, wangenwa zinkokheli ezivele kunhlangothi ezehlukeneyo kwezokulondolozwa kwemvelo, uthi sekuvele obala ukuba ukuvikela umlilo akuqakathekiswa njengoba abatshisa igusu benikezwa izigwebo ezingatsho lutho, wona amahlathi eqhubeka etshabalala.
Osaphethe isikhundla sikamsekeli womqondisi kulolugatsha lwezokulondolozwa kwezemvelo, unkosikasi Veronica Gundu Jakarasi, uthi bayaluqakathekisa udaba lokulondolozwa kokwanda kwemililo kakhulukazi ngalesi sikhathi komile, kusukela mhla ka 31 kunyanga kaNtulikazi kusiya kumhla ka 31 kunyanga kaMfumfu.
UGundu uthi abogatsha lwakhe bakhangelele ukuguqulwa kwemithetho, bagwetshwe ngokufaneleyo abatholakala belamacala wokutshabalalisa amagusu lempahla unkosikazi Gundu athi kuzaphathisa ekuthini uzulu ayiqakathekise laye imvelo.
Kubikwa inani eledlula isigidi, samahlathi lamagusu, etshabalala ngomnyaka okubangela ukulahlekelwa ngamadlelo, amagusu,lapho kulinywa khona izihlahla ,izifuyo,impahla kanye lemiphefumulo yabantu.
Amatshumi ayisikhombisa lambili abantu belahlekelwe yimiphefumulo kuminyaka emihlanu edluleyo kuthi impahla ebiza izigidi zamadola, itshabalaliswe ngumililo.
Kungakho uhulumende ethi kungumlandu wakhe wonke umuntu ukuba aphatheke kule mikhankaso yokulondolozwa kwamahlathi lempahla.
Inkokheli zomdabu zikuthazwa ukuba ziphatheke ngokugcweleyo kulomsebezni, kusetshenziswa lezo ndlela zendulo ebezisetshenziswa ngokhokho, ukulondoloza amagusu.
Leliqula lalabo abazaphatheka kulemikhankaso yokwenqabela ukutshabalaliswa kwamahlathi ( National Fire Committee ), elethulwe lamuhla okusemthethweni, libalisa ingatsha zikahulumende, inhlanganiso ezisebenza zizimele kwezokulonmdolozwa kwemvelo kanye lenkokheli zezigaba.