Inhlanganiso elwela ilungelo labasakhulayo eye Youth Agenda Trust isola ukuqubekela phambili komkhuba wokusetshenjiswa kwabatsha emisebenzini engela buntu kanye lodlakela ngabezombusazwe ngesikhathi okumele uhulumende abe ebalungiselela imisebenzi ezwayo elizweni.
Umqondisi we Youth Agenda Trust umnumzana Lawrence Mashungu uthi izehlakalo ezilokhe zisenzakala emihlanganweni yebandla le Zanu PF zokusetshenjiswa kwabatsha belwisana belwelwa izikhundla yinto edanisayo kakhulu ngesikhathi uhulumende ekhangelelwe ukuba abasungulele imisebenzi emitsha.
Obona ngokuqutshwa kwenhlelo zalinhlanganiso umnumzana Trust Nhubu uthi abatsha sokumele belwele amalungulo abo akusisekelo sombuso esitsha okuba belungiselwe imisebenzi , izikolo, amakilinika lamakolitshi azwayo kulokusetshenjiswa.
UMashungu uthi kuyamangalisa ukuba kuzekube lamhlanje izinto ezinje zicina ziphazamisa lemisebenzi yabo yokuqhuba imihlangano labatsha ezabelweni ezitshiyeneyo zelizwe.
Sikhulumakanje bathi babhekane lenkinga ezithile lapho beqhuba imihlangano eBell Mine enkabazwe lase Redcliff ngemva kokuba abanye abatsha bethusele uzulu ekungeneni imihlangano enje.
UNhubu uthi noma kungela mikhankaso lemihlangano yezombusazwe okwamanje kukhanya lokhe kulokwesaba lokungethembani kuzabelo kundaba zezombusazwe okuphazamisa lamalungelo abantu.
UMashungu uthi batsho konke okhu ngoba lemihlangano enziwa yinhlanganiso yakhe yokwazisa abatsha ngomumo wesisekelo sombuso ezabelweni ezitshiyeneyo zelizwe ikhanya ithathwa njengomsebenzi wezombusazwe wona ungenani leze politiki.
Abatsha bavame ukusetshenjiswa ngamabandla ezombusazwe ngesikhathi kulokhetho eduzani kodwa kubikwa kulokulwisana lapha lalaphaya emihlanganweni yezigaba kubandla le Zanu PF kulandela ama rally ka nkosikazi Grace Mugabe abhekana lokulwisana kwabatsha lawo.