Ukusilela kosekelo emsebenzini yohlangothi lwezemfundo eZimbabwe oluvela kuhulumende kubikwa kuyiyo imbangela enkulu ebuyisela muva intuthuko yesizwe, ngesikhathi ilizwe lifikisa iminyaka engamatshumi amathathu lanhlanu lathola uzibuse.
Ukubhidlika komnotho welizwe okuqubekela phambili sokubangela ukuba inkulungwane lenkulungwane zabantu okugoqela labalemfundo yaphezulu abaphuma emakholitshini bephile ngokuthengisa ezitaladeni lasemikambo ngoba imisebenzi ingasatholakali.
Umnumzana Trust Nhubu wenhlanganiso ye Youth Agenda Trust uthi noma uhulumende esungule kakuhle sithola uzibuse ngokuvula izikolo ezinengi wacina esesehluleka ukusekela limisebenzi yemfundo ngokuzwayo lokwandulela imisebenzi engatholwa yizifundi ziqeda izifundo zazo zaphezulu, ethi inhlanganiso yakhe imangaliswa yikwanda kwabatsha abayabe bephutshe izifundo abafuna uncedo lokusungula ama project ngoba bengela misebenzi.
Uthi infundo esilayo okwamanje ayisaphathisi ilizwe kangako ngoba inengi labantu licina liphuma elizweni lisiyasebenzela kwamanye amazwe ngoba imisebenzi ingekho eZimbabwe.
Umnumzana Simbarashe Moyo wenhlanganiso ye Student Solidarity Trust uthi inkinga yikuba uhulumende wacina elahleka wehluleka ukusekela ezemfundo ngemali osokutshiya abazali bengenelisi ukubhadalela abantwababo ezikolo njalo lezifundi zema university zithwele nzima ukuba zithole imfundo, kodwa isisekelo sombuso sikubeka sobala ukuba kumele kube lilungelo lomntwana wonke ukuthi atholiswe imfundo ye primary ingela mbadalo, uhulumende aphinde esekele imfundo yaphezulu.
Umnumzana Thomas Gamure oyisifundi uthi sokudingakala ukuba imfundo ihlanganisele ezemidlalo ethi ama University akuleli akhanya esalela Kuloludaba.
U Moyo uthi I Student Solidarity Trust iyayisola kakhulu imbiko kampathintambo wezemfundo yokuba sebezabhadalisa imali yemihloliso ezifundweni zika grade seven ethi lokhu yikho okubulala intuthuko yesizwe ethi bakhankasela ukuba lezifundo ze university zithalakale kungelambadalo eZimbabwe.
Umqondisi wenhlanganiso ye Zim-Cache.net, umnumzana Thuthani Moyo uthi imfundo yemisebenzi yezandla okugoqela lomculo okufundelwa ngabanye kulezinsuku bephilangakho, ikhuthazwe ngokwengezelelweyo.
Uthi uhulumende waphosisa ngokwesula izikolo ezazifundisa imisebenzi yezandla ezama F2 ethi singakhangela kulezinsuku inengi lezizalwane zakuleli seziphila ngokuzenzela kunye lokuthengisa imfundo yona iqakathekisa ezokudinga imisebenzi engekhoyo.
Uthi ukusilela kosekelo lwemali ezifundweni zemisebenzi yezandla kungaqubeka ubona imfundo ikakhulu eye primary isibuyela kubazali, ngoba sokulentuthuko enkulu kwezemitshina yetechnology bengenelisa ukuyisebenzisa ukuzifundisela abantwababo.
Incitshi zithi ele Zimbabwe ngelinye lamazwe alitshumi emazweni angezansi yenkangala ye Sahara elibalekelwa yizizalwane zalo zisiya sebenzela kwamanye amazwe liphakathi kwamazwe afana le Mali, Burkina Faso, Ghana, Eretria, Nigeria, Mozambique, Sudan le DRC.
Inhlolisiso yenhlanganiso ye National Human Resource Survey yomnyaka ka2006 yatshengisa ukuba isilinganiso esingamatshumi ayitshiyangalombili ekhulwini- 80% sabo dokotela, abongi, ama pharmacist lama radiographers afundela umsebenzi kuleli ngomnyaka ka 1980 aseatshiye umsebenzi aphuma elizweni sifika kuminyaka yabo 2000.