Izakhamizi zeZansi yemaNdebeleni zithi zilethemba lokuthola isivuno esithe xaxa lonyaka kulandela ukuna kwezulu endaweni ezitshiyeneyo zelizwe kuyonale iviki, lanxa inengi lisakhala ngentengo ephezulu yenhlanyelo.UAlbert Ncube usipha loludaba ngokugcweleyo.
Izakhamizi esixoxe lazo zithi ukuna kwezulu lonyaka kuyathembisa njalo zilakho ukuthi zithole okokudla emasimini ngemva kweminyaka yendlala.
UMnu. Willis Gumbo oyisakhamuzi seMagedleni eGwanda North uthi ngokubona kwakhe isimo kasisoze safanana lanyakenye lapho izilimo ezatsha khona kwavunwa amajodo kuphela.
UNkosikazi Laycee Moyo oyisakhamuzi seNsindi uthi uhlawule umnikazi wethilakitha inkulungwane zemali yama Rands ngoba engelampahla zokulima.
UNkosikazi Happy Mshado esinye njalo isakhamuzi seNsindi sikhala ngenhlanyelo engamiliyo.
UMnu. Mbereki Noko uthi wafika eNsindi ngomnyaka ka 2003 njalo ufisa izulu line lonyaka ukwenzela ukuthi izakhamizi zithole ukudla ngoba ezitolo sokubiza kakhulu.
UNkosikazi Diana Banda ngomunye wezakhamizi ezaphiwa inhlanyelo ngohlelo lukahulumende olweGatshompo njalo uthi uyasuthiseka ngalokho akubona emasimini.
Inani lenkomo elibulawa yindlala likhangelelwe ukuthi lehle lonyaka ngoba inkomo ebesezicuba ngenxa yendla seziqinaqina nengoba utshani sebuhluma.
Izanuse zomumo womkhathi zithi zikhangelele izulu line kuhle lonyaka okulakho ukwehlisa inani labantu abahlaselwe yindlala kulesisabelo.
Your browser doesn’t support HTML5
UAlbert Ncube Uyalandisa