Sezidlela evalweni izizalwane zeZimbabwe ezihlala kweleSouth Africa kulandela ukwanda kwezehlakalo zokudutshulwa kwezimuli emizini yabo elizweni jikelele.
Kumaviki asanda kwedlula kudutshulwe kwabulawa imuli yabantu abayisitshiyagalombili (8) elokitshini leOrange Farm esezansi kwedolobho leJohannesburg. Lababantu babulewe ngumnini weshabhini ngemva kokulwa lelunga lalo umdeni ebelifuna ukuthenga utshwala.
Ekupheleni kwenyanga kaMpandula kudutshulwe kwabulawa amalunga emuli alitshumi lasitshiyagalombili (18) endaweni yeLusikisiki esabelweni seEastern Cape. Phakathi kwenyanga kaMpandula loMfumfu kuphela kulezehlakalo ezinengi zabantu abadutshulwe sikhathi sinye - ama-mass shootings- kugoqela abane (4) abadutshulwe eDurban labayisithupha (6) abadutshulwe eLusikisiki njalo. Bathithibele ababulawelwe izihlobo.
Owesifazana wakweleSouth Africa uNkosazana Lorraine Maisha uthi nguye yedwa lengane emunyayo abasindileyo ekudutshulweni kwemuli eOrange Farm.
“Mina ngaya ngemva komkhukhu ngafika ngalala phansi. Ukulala kwami phansi ngiyambona. Ngiyezwa la amabullet pha-pha-pha. And ngiyezwa ukuthi lama bullet usebenzise isibhamu sokuqala zaphela wathatha isikhatshanyana ngiyamuzwa uyakhokha, washaya washaya. Angikho right. Lamanje angikabelivi.”
Izizalwane zeZimbabwe ezihlala kweleSouth Africa zithi izehlakalo zokudutshulwa lezi zenzakala ubusuku lemini endaweni abahlala kuzo ikakhulu eHilbrow, Berea laseYeoville lapho okuhlala khona abeZimbabwe abanengi. Isizalwane seZimbabwe uNkosazana Sithembinkosi Sikhosana uthi sekusesabisa ngoba bavikana lalokhu kufa nsukuzonke.
“Banengi abantu beZimbabwe abadutshulwayo. Sihamba kumapalour almost every week abantu bethwalelwa khonale ekhaya eZimbabwe. Kubuhlungu kakhulu into eyenzakalayo. Izibhamu mpela ezingekho emthethweni ngabe ziyakhitshwa emphakathini ngoba akukho safe.”
Le yinto egcizelelwa ngesinye isizalwane seZimbabwe uMnunzana Cosmas Ncube yena othi usizi yikuthi uthola sekulabanye abeZimbabwe abaphathekayo kulobubugangi.
“Yinto eyethusa kakhulu leyo. Sekunzima lokuthi sihlanganyele labanye senze ulutho sibuthene ngobà asazi ukuthi siyodutshulwa lapho ngoba labadubulayo ababotshwa. Yiyo into esabisa kakhulu abantu bayaganga kodwa irate yabantu ababotshwayo, izigangi ezibotshwayo, incane kakhulu .”
Kuwonala amaviki asanda kwedlula kudutshulwe oweZimbabwe otshayela imota yeBolt eBerea. Zinengi izehlakalo zokudutshulwa kwezizalwane zeZimbabwe ezibikwa mihla yonke ikakhulu lapho abanengi khona eHilbrow, Berea, Yeovile lasemalokitshini afana leThembisa leSoweto. Umphathintambo wogatsha lwendaba zamamapholisa kweleSouth Africa uMnunzana Senzo Mchunu utshaya phansi ngenduku esithi noma kanjani amapholisa azawuqeda du lumkhuba wokusetshenziswa kwemibhobho ukubulala abantu. Kodwa uMchunu uthi loku kuzadinga ukuthi umphakathi uphatheke kule impi.
“Siyanicela bantu bakithi. Sishilo laphaya eGqebega ukuthi amaphoyisa akusizona izangoma. Awakwazi ukubhula athi kunesibhamu laphaya, nakulowa umuzi. Adinga thina ukuthi sisebenze nawo besenza umsebenzi wabo.”
Ngokutsho kwezibalo zamapholisa phakathi kwenyanga kaNtulikazi loMpandula nyakenye bekudutshulwa abantu abangamatshumi amathathu lane (34) ngelanga.
SEE ALSO:
Udaba Esilwethulelwe NguThuso Khumalo