Sebezinkulungwane phose ezine-3,848, abantu asebesinde kuCovid 19, eZimbabwe. Leli gcikwane selibulele abalikhulu lamatshumi edlula amathathu-135. Kuthi asebefunyenwe belegcikwane leli elizweni sebezinkulungwane ezedlula ezinhlanu-5,308.
Emazweni awezwekazi leAfrica asebebanjwe belegcikwane leli, sebedlula isigidi - 1,128,245, labulala inkulungwane phose ezingamatshumi amabili lane- 25,884, kubika abenhlanganiso yeAfrican Union.
Abekholitshini leJohn Hopkins University bona bathi emhlabeni jikelele sebeyizigidi ezedlula amatshumi amabili - 21,918,920, abafunyenwe beleCovid 19, yabulala inkulungwane ezingamakhulu ezedlula eziyisikhombisa- 774,769.
Ukukhuphuka kwenani labantu abasebefunyenwe belegcikwane leli, koBulawayo, sekutshiye izakhamizi zalelo dolobho zikhathazekile.
IBulawayo ikusibanga sesibili elizweni, nxa kukhangelwa indawo ezilenani eliphezulu lababanjwa yicovid 19, lingemuva kweHarare eliyilo idolobho elikhokhelayo. KoBulawayo sekulabantu abedlula inkulungwane -1,200, asebetholakele belecovid 19, selibulele abedlula amatshumi amabili - 25. Izakhamizi zalelidolobho sezikubona kuqakathekile ukukhuthazana ukuhlonipha iziqondiso zikahulumende, ezeLockdown, emizameni yokuvimba ukumemetheka kwaleligcikwane.
Inthathelezindaba , u- Nkosikhona Dibiti, eyasungula umsakazo weCommunity Podium TV, ojonge ukufundisana lozulu ngaleligcikwane, itshele umsakazo weStudio7 udaba lokuswelakala kwamanzi edolobheni leli, lwenza ukuthi izakhamizi zalelidolobho, ikakhulukazi abaphila emalokhotshini, bengahloniphi umthetho welockdown, okhuthaza uzulu ukuthi ahlale ezindlini.
Ingxoxo Phakathi KukaMike Hove lo Nkosikhona Dibiti
“Amalanga amabili adlulileyo, bekungela amanzi emalokitshini, ngingathi phose wonke, so izibhorane, zigcwele abantwana abathunywa ngabazali ukuthi hambani liyothatha amanzi, bayabe befuqana khonalapho. Isibhorane sibanjwa ngumuntu wonke phela. Can you imagine ukuthi kungenzakalani khona nxa kungabe kulomuntu obeleCOVID-19 ohambe laye esiboraneni,” kutsho uDibiti.
Your browser doesn’t support HTML5
Ingxoxo esiyenze loNkosikhona Dibiti