Ukukhalala umsebenzi kwezisebenzi zekhansili yedolobho leChitungwiza okuqale ngeviki edluleyo sokudale umonakalo ogoqela ukuvalwa kwamakiliniki kamanisipala, okuyinto esifake izigulane engozini enkulu.
Amakiliniki la avaliwe lanxa nje umabhalane walikhansili ebeke wathi sebecele abongi bebutho ukuthi bazokwelapha izigulane umanisipala esakhulumisana lezisebenzi.
Izisebenzi zekhansili yeChitungwiza zithi sezilenyanga eziphakathi kweziyisitshiyagalombili letshumi zingaholi njalo umanisipala uzikweleda imali engange $11 million.
Ngaphandle kokuvalwa kwamakiliniki, ukukhalala umsebenzi kwezisebenzi lezi sokubangele ukungabuthwa kwezibi lokungalungiswa kwezititshi zempompi ezithwala ingcekeza yezambuzi nxa zithe zadubuka.
Izisebenzi zikamanisipala weHarare lazo zithi zilakho ukukhalala umsebenzi kunsukwana ezilandelayo ngoba sezilenyannga ezithile zingaholi. Amkhansili amanengi elizweni abhekane lodubo olufanayo ngenxa yokuswela imali.
Ukuhlaziya loludaba sixhume ukhansila weHarare uMnu Peter Moyo lonobhala jikelele wenhlanganiso emela izisebenzi zamakhansila amadolobho iZimbabwe Urban Councils Union, uMnu Moses Mahlangu.
Ababili laba bathi ukuswela imali kwamakhansili kubangelwe yikwesulwa kwezikwelede zikazulu kumakhansili nguhulumende ngaphambilini kokhetho lwanyankenye.
Your browser doesn’t support HTML5
Ingxoxo LoMnu Moses Mahlangu LoMnu Peter Moyo