Inhlanganiso ezimela izizalwane zakwamanye amazwe kweleSouth Africa lezikazulu walelo lizwe sezisole kakhulu ukuhlaselwa kwezizalwane zakwamanye amazwe okuqhamuke esabelweni saKwazulu eNatal njalo zikhuthaza uhulumende ukuthi amise lokhu kuhlasela ngokuphangisa.
Amakhulu ezizalwane zakwamanye amazwe okugoqela labeZimbabwe sebebalekile bayacatsha enkambeni zamapholisa endaweni ezitshiyeneyo eKwazulu Natal ngemva kokuhlaselwa yizizalwane zakweleSouth Africa.
Abenhlanganiso lezi babuye basola umongameli Mugabe lomongameli Zuma ngokwehluleka ukukhuza abantu abaphatheke kulokhu ngesikhathi somhlangano wabo osanda kuphela ePretoria.
Impi yokuhlaselwa kwezizalwane zakwamanye amazwe iqhamuke esabelweni saKwazulu Natal iqhubekela phambili imemetheka endaweni ezitshiyeneyo zalesi sabelo. Amakhulu abantu bakwamanye amazwe sebebalekele ezinkambeni zamapholisa lapho abalala betshazwa khona ngumqando besidla lengqweqwe zomlomo.
Inhlanganiso zikazulu sezisole kakhulu Inkosi uGoodwill Zwelithini njengoba ukuhlasela lokhu kuqale ngemva kwenkulumo yakhe yokuthi bonke abaselizweni ngokungekho emthethweni kufanele babuyele kubo.
Isizalwane seZimbabwe umnumnzana Carnicious Nkala, uthi sekusezandleni zikahulumende ukuthi angenele kuloludaba kungakabulawa abantu abanengi.
Umgcinisihlalo wenhlanganiso ye Zimbabwe Community in South Africa umnumnzana Ngqabutho Mabhena, uthi osekusobala yikuthi ukwehla kwezomnotho kweleSouth Africa yikho osekubangela ukuthi abakuleli bacabange ukuthi abakwamanye amazwe bayabaminya.
Loba kunjalo kayisibo bonke abakweleSouth Africa abafuna abakwamanye amazwe bahlaselwe.
Umnumnzana Mkhululi White, ocine ebumba inhlanganiso yokuvikela amabhizimusi abakwamanye amazwe ngemva kokuhlaselwa kwawo, ukhuthaza amakhosi lenkokheli zezombusazwe ukuthi balusukumele loludaba. Uxwayisa njalo ngelithe lumkhuba ungekelelwa uzabangela ukuthi abakweleSouth Africa labo bahlaselwe kwamanye amazwe.
Emhlanganweni wenhlanganiso zikazulu osanda kwenziwa, inkokheli zawo zisole kakhulu umongameli Mugabe lomongameli Zuma ngokwehluleka ukukhuza ukuhlasela lokhu ngesikhathi somhlangano wabo abasanda kuwuqhuba ePretoria.
Unkosikazi Elinor Sisulu, ongumkakhe kaMnumnzana Max Sisulu obengusomlomo wephalamende kweleSouth Africa, uthi kuyadanisa ukuthi inkokheli zombili lezi azizange zizihluphe ngaloludaba.
Kusenjalo izizalwane zeZimbabwe lazo zisola uMongameli Mugabe ngokwehluleka ukuhlangana lazo ngesikhathi ekweleSouth Africa okwamalanga amabili. Bakhonake abathi mhlawumbe isizatho sakhe sokungaqhubi umhlangano labantu makhaza ubesesabela ukuthi kungahle kube khona abakuveza engcekeni ukuthi kabasafuni ukuthi aqhubeke ebusa.
Ekufikeni kwakhe kwele South Africa kuke kwaphuma imbiko ethi abenhlanganiso zikazulu bebeqoqa ukutshengisela , enkundleni yendizamtshina eye Oliver Tambo besola umbuso wakhe kanye lokuthi akenzi lutho ekudingweni kwentathelizindaba ebi tshengisela isola umbuso wakhe u-Itai Dzamara oselenyanga enyamalele, ethunjwa ngabantu abangaziwayo. Kasafikelanga eOliver Tambo kodwa wayafikela enkundleni yebutho.