Kuqhubekela phambili ukufuthelana phakathi kwebandla leZanu PF kulabanye abafuna ukuthi uMnu. Emmerson Mnangagwa, umsekeli kamongameli, athathe intambo zombuso nxa uMugabe esesukile esikhundleni. Kulabanye njalo abatshaya phansi ngenduku besithi kungeke kwenzakale ukuthi uMnangagwa angene esikhundleni.
Ukulwisana kubandla leli kuqale ngomnyaka ophelileyo ngesikhathi somhlangano walo weCongress okuxotshwe amanye amalunga aleli bandla abagoqela iziphathamandla ezinjengo Nkosikazi Joice Mujuru labanye besetheswa umlandu wokufuna ukukhipha uMugabe esikhundleni.
Lokhe kuqhubekela phambili ukufuthelana lokhu osokubonwa nguzulu lebulenjini beInternet lapho osokuphoselwana amagama aqatha.
Omunye walabo abasanda kuthethiswa ebulenjini beTwitter nguMnu. Jonathan Moyo umphathintambo wezemfundo otshelwe nguMnu. Justice Mayor Wadzajena ukuthi kumele ame ukuthuka inkokheli yebandla leli. Umcaze njengomuntu olamadimoni kumbe oziphatha njengomntwana oncitshwe inamunede.
UMnu. David Ndlovu wedale leCentral Committee kubandla leZanu PF uthi kulungile ukuthi abalandeli bebandla leli baveze imbono yabo ngezombusazwe laloba yehlukile.
Kusobala ukuthi abalandeli bebandla leli balwela izikhundla njalo lokuthi ngubani ozathatha isikhundla sikaMugabe nxa engasuke kiso.
Lokhu kusekelwa nguMnu. Dumisani othi lanxa kukhona okungehlela uMugabe engakaphumi esikhundleni kungeke kwenzakala ukuthi uMnangagwa angene esikhundleni lesi njengokufiswa ngabanye.
Okunye okungenza ukuthi iZanu PF ingakhethi uMnangagwa uthi ngoba unakanelwa ukuthi ngomunye owaphatheka kumbuqazwe weGukurahundi.
Akwaziwa ukuthi kuyozalwa nkomoni njengoba kuqhubeka ukulwisana lokufuthelana kuZanu PF. Abadala bathi sizayicela isivuthiwe.
Your browser doesn’t support HTML5
Udaba lokufuthelana okukuZanu PF abanye besithi uMnangagwa uzathatha isikhundla sikaMugabe