Kuqhubekele phambili ukufuthelana edolobheni leChitungwiza ngoLwesithathu kulandela udlakela oluqhamuke ngoMvulo phakathi kwabasebenza ukuthwala uzulu ngamakhombi lamapholisa labacatshangelwa ukuthi ngabasekeli bebandla leZanu PF.
Abantu laba babikwa beye emahofisini kamanisipala walelidolobho bekhonona ngokukhwezwa kwemali yomthelo abamele bayibhadale ngomnyaka isuka ku $70 isiya ku $100.
Umanisipala ubikwa ethumele abasakhulayo abacatshangelwa ukuthi ngabebandla leZanu PF ukuthi baxotshe abantu laba kwasekuqhamuka udlakela kwalwisanwa amapholisa lawo angenela atshaya abambalwa kwabotshwa abedlula amatshumi amane.
Isehlakalo lesi sitshiye izisebenzi labanye kade befuna ukuya eHarare bengela okokwenza. Umgcinisihlalo wenhlanganiso yezakhamizi zalelidolobho, eye Chitungwiza Residents’ Trust, uMnu. Marvellous Khumalo utshele iStudio Seven ukuthi lokhu kulokufuthelana lanxa abantu sebeqale ukwenza imisebenzi yabo.
"Lamhlanje asizange sibone udlakela njalo laba abemitshova sebebuyele emsebenzi yabo. Kodwa sibona abanye abantu esingabaziyo esicabangela ukuthi bengaba yilabo abahlolayo abe security sector labanye abantu esingabaziyo ukuthi bavela ngaphi," kutsho uKhumalo.
UKhumalo uthi kulabanye abathengisa ezitaladeni, ikakhulu omama, abathathelwa impahla yabo kodwa uthi sebeqalisile umsebenzi wabo.
Wengezelele esithi abazi inani labalimeleyo kodwa esithi ucela bonke abatshaywayo ukuthi baye emahofisini ehlanganiso yabo.
Your browser doesn’t support HTML5
Ingxoxo loMnu. Marvellous Khumalo