Ukufuthelana sokufike kuzinga elibi kuhulumende womanyano ngemva kokuba uMongameli Mugabe ngeviki edluleyo ekhethe osibalukhulu bezabelo abebandla lakhe leZanu PF engazange akhulumisane labakhokheli bamacele womabili eMDC.
UMugabe wenze lokhu lanxa nje isivumelwano seGlobal Political Agreement sikubeka sobala ukubana abanye osibalukhulu kumele babe ngabamacele womabili eMDC, elikhokhelwa nguMnu Morgan Tsvangirai lelikhokhelwa nguMnu Arthur Mutambara.
AbeMDC bathi bacunuke kakubi ngenyathelo leli. Kunyanga ezedluleyo uMugabe ukhethe iziphathamandla zebandla lakhe ukuba ngabameli beZimbabwe kwamanye amazwe engakhulumisananga njalo leMDC.
Ekhuluma ngoLwesine, uMnu Tsvangirai uthe uzakwazisa amazwe lapho uMugabe athumela khona abameli beZimbabwe laba ukuthi engaze abananza ngoba ukukhethwa kwabo kwenziwe ngaphandle komthetho.
UTsvangirai uthe ibandla lakhe kalisoze libananze bonke labo abakhethwe nguMugabe engakhulumisananga laye loMutambara, okugoqela abahluli bedale leHigh Court, usibalukhulu weReserve Bank of Zimbabwe uMnu Gideon Gono legqwetha elikhulu likahulumende uMnu Johanes Tomana.
Isikhulumi seMDC ekhokhelwa nguMutambara uMnu Nhlanhla Dube utshele iStudio 7 ukuthi ibandla lakhe lisola kakhulu ukukhethwa kwamalunga eZanu PF nguMugabe ukuba ngosibalukhulu engazange akhulumisane leMDC.