Ingcwethi kwezokulima zithi ukuxotshwa kwenkulungwane zezakhamizi ezetheswa umlandu wokuzihlalisa emhlabathini kahulumende ngaphandle komthetho kuzabangela ukuthi umumo wendlala ube mubi ngamandla ngoba abantu laba betshiyiswe izilimo zabo zingakavuthwa emasimini.
Uhulumende ududule izakhamizi lezi endaweni ezitshiyeneyo zelizwe ezigoqela eGwanda, eMasvingo, eKaroi laseChipinge, lapho amapholisa athi asebophe khona abantu abazinkulungwane phose ezine, 3,775.
Phakathi kwabantu laba, abafika phose inkulungwane eyodwa, 985, batholakale yimithethwandaba belecala njalo betheswa isigwebo sokupika okwenyanga eziyisithupha kumbe ukuhlawula ifayindi yeUS$100.
EleZimbabwe libhekane lendlala embi lonyaka njalo sikhuluma nje abantu abafika phose izigidi ezintathu, 2, 7 million badinga usizo lokudla oluphuthumayo.
Ingcwethi kwezokulima uDr Freedom Mazwi, osebenza lenhlanganiso yeSam Moyo African Institute of Agrarian Studies njalo efundisa eUniversity of Cape Town kweleSouth Africa utshele iStudio 7 ukuthi ukududulwa kwabantu laba kuveza sobala ukuthi uhlelo lokwaba kutsha umhlabathi aluqhutshwanga kuhle.
Your browser doesn’t support HTML5
Ingxoxo loDr Freedom Mazwi