UMongameli Mugabe usole amazwe athuthukileyo ngoMvulo esithi yiwo abangela ukuguquka komkhathi khona osokubangele ukutshisa okubi emhlabeni kanye lendlala ikakhulu eAfrica.
Ekhuluma emhlanganweni wabakhokheli bamazwe omhlaba eFrance, uMugabe uthe njalo kungumlandu wamazwe la ukuthi ancedise amazwe asathuthukayo ngemali ukulwisana lomthelela wokuguquka komkhathi lokhu.
Amazwi kaMugabe agcizelelwe nguMongameli weMelika uMnu Barack Obama yena ovumileyo ukuthi eleMelika ngelinye lamazwe abangela umonakalo womkhathi ngentuthu ephuma ezimoteni lemalahleni asetshenziswa ema industry.
"Ngiyakuvuma ukuthi ilizwe lami ngelinye elibangela ukuguquka komkhathi, ngalokho sizimisele ukusebenza lamanye amazwe silungisise lolu daba," kutsho uObama.
Ingcwethi kwezombusazwe uDr Nkululeko Sibanda uvumelana loMugabe esithi amazwe athuthukileyo afana leChina yiwo awona umkhathi, ngakho kumele akhokhele umkhankaso wokulwisana lodubo lolu.