Owesilisa obotshwe esetheswa icala lokuthuka uMongameli Emmerson Mnangagwa eBeitbridge ngemva kokuhlabela ingoma esola uMnangagwa esithi nguye obulala umnotho weZimbabwe umiswe enkantolo ngoLwesine wakhululwa ngemali yesibambiso, i-bail, yamadola aseMelika alikhulu, i-US$100.
Umsolwa uEzekiel Chiradza, ungunogada osebenzela umasipala weBeitbridge njalo ubemelwa ngamagqwetha enhlanganiso yeZimbabwe Lawyers for Human Rights. Ubotshwe ngoMvulo.
Umantshi uTakudzwa Gwazemba umlaye ukuba engalokothi ethusele abafakazi futhi kumele ahlale kukhethi ayethulele inkantolo icala lakhe lize liphele ukuthoniswa.
I-Zimbababwe Lawyers for Human Rights iyakusola kakhulu ukubotshwa kukaChiradza isithi kuveza sobala ukuhlukuluzwa kwabantu lokwephulwa kwamalungelo abo nguhulumende kaMnangagwa.
Lanxa kulicala ukuthuka uMongameli phansi komthetho weCriminal Law Codification and reform Act, i-video ebotshelwe umsolwa imveza echothoza uMnangagwa hatshi ukumhlambaza.
Amapholisa athi ku-video le uChiradza ubencoma njalo owayekhokhela ibandla leCCC uMnu Nelson Chamisa.
Ukuhlaziya loludaba uNtungamili Nkomo weStudio 7 uxoxe loMnu Swithern Chiroodza owebandla leCCC loMnu Believe Gaule oweZanu PF onguye osungula lingxoxo.
Your browser doesn’t support HTML5
Ingxoxo loMnu Believe Gaule loMnu Swithern Chiroodza