Indawo ezinhlanu koBulawayo kanye le Tsholotsho eningizimu yeMaNdebeleni sezikhangelele ukuphatha ukhetho ngoLwesithathu ukudinga abammeli edale lephalamende olukhangelelwe ukuthi luzakwenza idolobho lakoBulawayo lithole abammeli bebandla leZanu PF okwakuqala ngemva kweminyaka elitshumi lanhlanu.
Ukhetho lolu luza ngemva kokukhankasa kabanzi kusetshenziswa indlela ezitshiyeneyo, abanye abathi yikudinga ukuthenga amavoti.
KoBulawayo, ngempelaviki umphathintambo wokubuswa kwezabelo, uMnumzana Ignatious Chombo, uthembise abahlala endaweni ezilokhetho indawo zokwakhela izindlu- ama stands, inkulungwane ngandawo yinye.
Lokhu kuza ngemva kokuba umsekeli kamongameli uMnumzana Phelekezela Mphoko, eqale ukulungisa imigwaqo e Cowdray Park okungenye yezindawo ezizakuba lokhetho.
ETsholotsho North, abancintisana loMnumzana Jonathan Moyo bathi ubenika abantu ukudla laye esithi libandla leMovement for Democratic Change elenza lokhu.
Kujikelwana inyoka iphila nje iZanu PF idinga ukunqoba okwakuqala kulelidolobho lokhu kwasungulwa ibandla le MDC.
Ingcwethi kwezombusazwe, uMnumzana Godwin Phiri, uthi ukuvotela ibandla elibusayo yikuzigwaza ngowakho ngoba okudingwa ngumhlubulo weMaNdebeleni akusikho indlela lelibandla elibusa ngayo.
Uthi ibandla leli lifuna ukuthi wonke amandla okubusa abe sezandleni zalo, abesesigodlweni eHarare, okuzenza kubenzima ngamandla ukuthi inhlelo zalelidolobho ziqhutshwe ngendlela.
Eyinye njalo ingcwethi, uMnumzana Kelvin Mazwi uthi lanxa ibandla leZanu PF belikhankasa lisithi abantu balivotele ukuze iBulawayo ibeyingxenye yeZimbabwe lokhu akuzukuguqula indlela lelidolobho elibuswa ngayo ngoba ibandla elibusayo alilamaqhinga loba isifiso sokuvuselela inotho yedolobho leli. Uthi lona ibandla leli lilezigigaba lemikhuba okutsho ukuthi lingangena khathesi phinde amabandla aphikisayo enelise ukulikhipha ngomnyaka ka2018.
Umnumzana Innocent Dube ocubungula ezombusazwe, uthi yena kulungile ukuthi uzulu wakoBulawayo abe labammeli bebandla elibusayo khona kuzakuba sobala ukuthi kuyini sibili okwenza lelidolobho lingaqakathekiswa.
Eminyakeni edluleyo, uthi bekuthiwa kungenxa yokuvotela amabandla aphikisayo kodwa khathesi nxa kuzanqoba iZanu PF kuhle ngoba uzulu uzazibonela kusiyafika umnyaka wokhetho oluzayo ngo 2018 ukuthi lelibandla libaphatha njani nxa belikhethile.
Akwaziwa ukuthi iyozala nkomoni kusasa ePumula/Magwegwe, Mpopoma/Pelandaba, Makokoba, Luveve le Lobengula koBulawayo leTsholotsho North eMatabeleland North.
Lanxa nje amabandla eMDC akhokhelwa nguMnumzana Morgan Tsvangirai, uMnumzana Welshman Ncube kanye lele Renewal Team, wonke engaphathekanga, kulabantu abangamatshumi amathathu lane abaphatheka kukhetho lwakoBulawayo. Laba bagoqela abebandla leZanu PF, iZapu, iMavambo Kusile Dawn, iNational Constitutional Assembly, iTransform Zimbabwe, iFreedom Front Party kanye lamalunga azimele wodwa.