Ukungena kukaNkosikazi Grace Mugabe kwezombusazwe sekungundabamlonyeni kuzizalwane zeZimbabwe ezinengi ezisemazweni.
Abanye bathi ukhanya eselungiselela ukuthatha intambo zombuso kodwa abanye bathi akalalo ikhono elidingeka kumongameli ongakhipha iZimbabwe enhlutsheni zezomnotho welizwe ebhekane lazo.
UBenedict Nhlapho inthathelizindaba yeStudio 7, uxoxa labeZimbabwe abakweleSouth Africa edingisisa ngokuthi kungani unkosikazi Mugabe esemlonyeni yabanengi ngalezi nsuku.
Selokhu engene endabeni zezombusazwe, iyakhula imibuzo yokuthi kungabe kunguye yini ozathatha intambo zombuso nxa umongameli Mugabe esetshiyile. Le yinto esingundabamlonyeni kunengi lezizalwane zeZimbabwe eziseSouth Africa.
Isizalwane seZimbabwe njalo eyintatheli uMkhululi Chimoio uthi okwethusayo yikuthi lobanje unkosikazi Mugabe engasiyo ngxenye yeziphathamandla zikahulumende, uxhaso aluthola embuthanweni yakhe yezombusazwe lufana xathu lalolo oluphiwa umongameli welizwe.
Umnumnzana Godfrey Phiri osebenza lenhlanganiso ezilwela amalungelo oluntu kweleSouth Africa uthi, inkulumo lendlela uNkosikazi Mugabe enzangayo embuthanweni yakhe kucina kufana lemi dlalo yokulingisa ebonakala kubomabonakude.
Esinye isizalwane seZimbabwe umnumnzana Future Moyo uthi kusobala ukuthi unkosikazi Mugabe nguye osebusa ilizwe.
Kodwa umnumnzana Phiri uphikisana lalokhu esithi intambo zombuso zisezandleni zabalawula ezomvikela.
Ngakwelinye icele umnumnzana Chimoio uthi, kula bathile kuZanupf abasebenzisa unkosikazi Mugabe ukuthi abacentele indlela yokuya esihlalweni sikaMugabe.
Umnumnzana Phiri, uthi uNkosikazi Mugabe akalalo ikhono elifuneka kulowo ongakhipha iZimbabwe ebunzimeni ebhekane labo.
UMoyo yena uthi indlela unkosikazi Mugabe ayisebenzisileyo ekukhankaseleni ukuxotshwa kwabathile kuZanupf, ikhombisa khona ukuthi isipho sokukhokhela akasiphiwanga.
UPhiri uthi ungakhangela emabhizimusini ache ezokulima lemisebenzini yakhe yokonga izingane abukho ubufakazi bokuthi ulenhlakanipho yokuvusa umnotho weZimbabwe osulele ngogedla.
Uthi nxa engavunyelwa ukuba ngumongameli umbuso wentando kazulu uzakuba lilihlo lentwala eZimbabwe.
Kanti umnumnzana Chimoi uthi kuqakathekile ukuthi unkosikazi Mugabe akhuzwe aziswe njalo ukuthi kakusinguye umongameli kodwa yena ngumkaMongameli.
Abanye baxwayisa ngokuthi ukwehluleka kukamongameli Mugabe ukwenza kucace ukuthi ngubani ozamtshiyela intambo zombuso, kuzaqhubeka kudala ingxabangxoza kwezombusazwe.
Your browser doesn’t support HTML5
Udaba lwempilo kaNkosikazi Mugabe