UGift “Ghetto” Nkala lonyaka usefikise iminyaka engamatshumi amathathu – 30 engumqeqetshi wabasakhulayo koBulawayo.
UNkala uqale ukuqeqetsha umdlalo wenguqu ngomnyaka ka1994 eleminyaka yokuzalwa engamatshumi amabili lambili – 22. Ubeqeqetsha iqembu labatsha eleEast Rovers ePumula East.
“Ngo1994 lapho ngangiqeqetsha abadlali ababalisa uMthandazo Ndabambi loFortune Mketiwa njalo senelisa ukufinyelela ku final eyePeter Ndlovu Trophy lapho esadliwa khona liqembu leMutare elaliloAmon Chimbalanga. Ngomnyaka ofanayo sangena kuCastle Cup saphelela ku semi – final. Ngomnyaka ka2000 singene ku final eyeChairman’s Under 14 Trophy lapho esasilabadlali abagoqela uPeter “Rio” Moyo. Kuthe ngo 2001 ngasengisiba ngumqeqetshi weqembu labakhulu,” kutsho uNkala.
Ngomnyaka ka2000 uNkala ukhethwe ukuba ngomunye wabaqeqetshi beqembu lamajaha aleminyaka engaphansi kwamatshumi amabili elimela idolobho lakoBulawayo.
“Umuntu owayenza saqeqetsha leloqembu nguAli “Baba” Dube ngoba kwakulokhu kuqeqetsha abaqeqetshi asebekhulile kodwa uBaba wathi yena silabafana abasakhulayo abanjengoGhetto kanye loCharlie okumele baphiwe ithuba. Saliqeqetsha leloqembu saphumelela silabadlali abagoqela uThomas Mketiwa, Guide Goddard kanye labanye abafana abanengi abacine bedlalela iqembu leHighlanders,” kuchasisa uNkala.
UNkala uthi uAli Baba Dube ngomunye wabaqeqetshi abadlale indima enkulu ekukhuleni kwakhe emsebenzini wokuqeqetsha.
East Rovers
“UBaba wasincedisa kakhulu, loba nje sekungani kasakhangelwa kangako, ngoba yibo ababesikhuthaza lapha lalaphaya. LoWillard Khumalo laye ungiphathise kakhulu ndawonye lomdala uGibson Homela yena onguye owenza sadlalela iqembu labakhulu eleEast Rovers ngoba wasithatha singabafana abaleminyaka engaphansi kwelitshumi lesikhombisa wasidlalisa kuqembu labakhulu,” kugcizelela uNkala.
UNkala uqale ukuqeqetsha elokhu esadlala njalo ubekuhlanganisa lokhu kwaze kwafika umnyaka ka2001 lapho athathwa khona liqembu leNjube Sundowns.
“Ngadlala okwenyanga ezithile kuqembu leNjube Sundowns ngoba abadala bamaqembu womabili bengazange bezwanane. Ngacina sengibuyela emuva kuEast Rovers ngoba abadala beEast Rovers kwakungani akubahambeli kuhle ukusuka kwami njalo phezu kwalokho leqembu lalingaqhubi kuhle. Ngacina sengibuyela njalo kwahle kwaba yikho ukuma kwami ukudlala,” kutsho uNkala.
Iqembu leEast Rovers
UNkala ofikisa iminyaka engamatshumi amahlanu lambili eyokuzalwa lonyaka, uthi sesiside isikhathi engumqeqetshi kodwa ubona angani izithukuthuku zakhe ziphelela eboyeni njengenja.
“Ngileminyaka engamatshumi amathuthu ngiqeqetsha kodwa angikaze ngithole ngitsho isenti yalo. Lidla mina esikhwameni. Inkinga nje ungani saloywa ngalo ibhola leli ngoba kuynzima ukuxexebuka kulo. Kodwa yona imicabango yokutshiyana lalo ikhona ngoba amaqembu amakhulu ayathatha abantwana laba esibaqeqetshayo kodwa engasiphi lutho. Lokhu kwenza sizibuze ukuba kanti vele sizihluphelani njengoba singatholi lutho,” kutsho uNkala.
Ngemva kokutshiya iqembu leEast Rovers ngo2010 uNkala ubumbe elakhe iqembu leToronto njalo ulikhokhele laze layadlala kusigaba seSouthern Region Division One ngo2017. Khathesi selidlala kusigaba seBulawayo Province Division 2.
SEE ALSO:
Esikwethulelwe NguJoseph Njanji - Profile