Imbiko kamphathintambo wezemibiko, uMnu. Jonathan Moyo, ethi ikhomidi ayibumbayo ethiwa yi Information Media Panel of Inquiry-IMPI, yaphiwa amadollar edlula kancane isigidi esisodwa lengxenye-$1,6 million ngesikhathi intathelizindaba zihlala inyanga ezimbalwa zingelaholo, isicunule abanye.
UMoyo ubanjwe ngamandla ngoLwesithathu ukuba achisisele uzulu ukuba ikhomidi yakhe yaphiwa malini ngummeli weBuhera edale, uMnu. Joseph Chinotimba owe Zanu PF, othe kukhanya kusondliwa ingcosana yentathelizindaba kodwa uzulu jikelele ethwelenzima.
UMoyo, obengekho edale uthole ithuba lokuphendula ngoLwesine phambi kwekhomidi yezokwethulwa kwemibiko wathi ikhomidi le iqakathekile ngoba abenza imithetho bamele babekwazi ngokujileleyo umumo wezokwethulwa kwembiko.
Amalunga ekhomidi le aphiwa amadola angaba yinkulungwane ezintathu-$3,000-00 ngelanga. Kodwa amalunga la aphoselana aqatha esethesana icala lokutshaphaza imali le wona kungelamsebenzi ewenzayo.
UChris Gande weStudio Seven uxoxe lengcwethi ecubungula ezombusazwe, uMnu. Nkululeko Sibanda othi ikhomidi ka Moyo le ikhanya yabunjwa ngenjongo yokuhuga intathelizindaba ukuthi zisebenzelane laye kuphela.
Your browser doesn’t support HTML5
Ingxoxo loMnu. Nkululeko Sibanda