UJoel Luphahla, owayengumdlali weqembu labesilisa elimela ilizwe elamaWarriors, uthi banengi abadlali abalaziyo ibhola emaphandleni kodwa kabaphiwa amathuba.
ULuphahla uthi banengi abadlali abangatholakala emaphandleni nxa kungaqhutshwa inhlelo zokubadinga emaphandleni kuphinde njalo kube labaqeqetshi abalesibindi sokusebenza labo.
“Emakhaya ithalenta linengi kakhulu yikuthi nje kasiziniki isikhathi esokuthi siphume siyephandle. Singathola abadlali abanengi abayabe befuna nje ukulolongwa ukuze badlale kusiba saphezulu nxa kungaqhutshwa inhlelo zokuyafundisa umdlalo wenguqu emaphandleni. Banengi kakhulu njalo abakudingayo lithuba nje kuphela. Thina saba lenhlanhla sabonwa ngababezidlulela.”
ULuphahla ubonwe ngumdlali olodumo osengumqeqetshi uMadinda Ndlovu edlala kibo ekhaya eTsholotsho njalo ngemva kwalokho ucine esebuye koBulawayo wazodlalela amaqembu abalisa eleCorrugated, eleZimbabwe Saints kanye leleHighlanders phambilini kokuthi ayedlala elizweni leCyprus.
Uthi kuqakathekile ukuba abaqeqetshi kanye labalandeli babekezelele abadlali labo abayabe bethethwe emaphandleni.
“NjengakuHighlanders lapha umdlali ovela ekhaya usengadlala kumaqembu abasakhulayo ngoba kithi ngapha abantu ngokwabo abalakho ukubekezela. Uyabezwa belokhu besithi kanti yindaba lingathathi abadlali emakhaya, siyake sibone abafana endaweni ethile, kodwa nxa usiyathatha umfana lowo uyabe efuna isikhathi ngaphandle kwabalutshwane abayabe bevele bezimbabazane abahle bafike bangene. Kithi manje kasisiphiwa lesosikhathi kodwa akumelanga sicatshe ngakhonokho.”
ULuphahla uthi umsebenzi wokuqeqetsha kawufuni amagwala njalo udinga abaqeqetshi abangayesabi ukusolwa.
“Mina ngikholwa ukuba ubunzima buyamlola umuntu. Kungaba lensolo ngiyahlala phansi ngihluze okutsho ukuba ekucineni ukusolwa lokhuya kuyangiyakha ngoba abantu abangeke bakusukele nje bakusole. Bakhona yebo abaphongusola kodwa kanengi awungeke ukhule kungela abakuqondisayo. Kunengi okusitshiya siginqe sitshiselwa kuqembu leHighlanders kodwa thina njengabaqeqetshi akumelanga abafana baze bakubone ukuthi lathi sesigedla amazinyo.”
ULuphahla uke wadlala njalo lakwele South Africa lapho adlalele khona iSupersport kanye lePlatinum Stars. Ekuphendukeni kwakhe eZimbabwe udlalele iHighlanders, iCaps United kanye leTsholotsho Football Club kwathi ngemva kwalokho uqale ukuqeqetsha lokusebenza lamaqembu abalisa eleBorder Strikers, eleTel One kanye leleGolden Eagles engakabuyeli kuqembu leHighlanders.
SEE ALSO:
Ingxoxo Esiyenze LoJoel Luphahla