Owake waba lilunga lephalamende emele iZengeza West uMnu. Job Sikhala okhululwe ejele izolo uthakazelela ukukhululwa kwakhe esithi okwamanje usazindla ingqondo ngezombusazwe ngoba kulabantu abanengi abafisa ukusebenza laye bezama ukuphumelela ngokuhlala kwakhe ejele umnyaka lengxenye.
Uthi bakhona abantu ayecabangela ukuba bazazama ukuncedisa ukuthi akhululwe kodwa bathula zwi.
Ekhuluma lentathelizindaba esemzini wakhe eSt. Marys eChitungwiza namuhla, uSikhala uthe uyajabula ngokuphuma kwakhe entilongweni. Ubonge kakhulu abantu bonke kanye lentathelizindaba ezibikele umhlaba jikelele ngokuvalelwe kwakhe nguhulumende kaMongameli Emmerson Mnangagwa.
uthe usahlolisisa okwenzakala kwezombusazwe okwamanje engakavuseleli esithi kukhanya engani kulokuxokozela okumangalisayo elizweni.
Uthe uzaqhubekela phambili elwisana lokuncindezelwa kwabantu nguhulumende kaMnangagwa labanye bakhe.
USikhala owathi evalelwa engumgcinisihlalo webandla lecitizens coalition for change elalikhokhelwa nguMnu. Nelson Chamisa uphinde wakhuluma njalo ngemibiko ethi usexoxisana labakucele leccc elikhanya okwamanje liphethwe nguMnu. Sengezo Tshabangu, ozithi ngunobhala jikelele weCCC.
Kodwa uTshabangu uphika ukuba uthume igqwetha ukuthi likhulume loSikhala.
Klabanye abathi ulakho ukusebenza lecele elisekela uChamisa kube lengxenye yebandla leCCC efisa ukudlelana laye. Omunye wabakubandla leccc uMnu. Fortune Mlalazi uthi uSikhala kumele acabangu kahle engakangeni ndawo kwezombusazwe.
USikhala obegwetshwe ukuba ahlale entilongweni okweminyaka emibili ebekwe eceleni okweminyaka emihlanu ngumantshi eHarare, uthi kunengi okumele ekwenze okugoqela udaba lwesidumbu sika MoreblessingAali, esesigcinwe isikhathi eside endlini yamakhaza eChitungwiza Hospital.
Abakubandla leZanu PF abagoqela uMnu. Mabutho Moyo bathi wenze kahle umthethwandaba ngoba ngowabantu bonke hatshi abaphikisayo kuphela.
Ogwetshelwe icala lokutshotshozela udlakela kulandela akwathula kusanda kubulawa uAli ngumsekeli webandla leZanu PF uPius Jamba Mutandi.
Ingcitshi kwezombusazwe njalo elilunga leJob Sikhala Solidarity Movement uMnu. Comfort Ncekuyenkosi Mpofu uthi bayamsekela uSikhala njalo bazalandela isinqumo azasithatha kwezombusazwe.
USikhala uchothoze kakhulu isimo esisemajele esithi ukudla okukhona, indawo zokudlela lendawo zokulala ziyadanisa.
Uqhubeke esithi okusobala yikuba uzulu wezimbabwe uthwele amagabha avuzayo ngenxa yesimo esibi somnotho welizwe. USikhala waqala ezombusazwe ngesikhathi esafunda eUniversity of Zimbabwe. Usebotshwe kanenginengi esetheswa amacala atshiyeneyo, ikakhulu awokulwela ilungelo likazulu lenkululeko kwele Zimbabwe.