Isithunywa somthethwandaba waphezulu owe High Court, siye emzini kaJim Kunaka, ilunga leZanu PF ukuyahlola impahla angayithathelwa ngemva kokwahluleka kwakhe ukuhlawula inkulungwane ezine zamadollar-$4,000 ngecala afunyenwe elalo lokukhokhela ekutshayweni kukamnumzana Prince Jack kudlakela lwezombusazwe, ngomnyaka ka2008.
Lokhu kuza ngemva kwesinqumo esethulwe ngumahluli weHigh Court uJustice Godfrey Chidyausiku mhlaka 15 Mabasa lonyaka, ukuba uKunaka, ahlawule leyo mali.
Limali ihlawulwa kubuyelwa muva kumnyaka ka 2009, izele isilinganiso sokuhlanu ekhulwini-5% interest, lapho atshaywa khona uJack owemzini weMbare eHarare, walimala kakubi kudlakela lwezombusazwe ngomnyaka ka 2008.
UJack uthole lesi sinqumo ngokuncediswa ngabenhlanganiso elwela ilungelo loluntu eye Zimbabwe Human Rights NGO Forum.
Umnumzana Kennius Shonhai igqwetha ebe limele uJack, uthi baemukele ngenjabulo isinqumo esethulwe ngumahluli. Ethi masibe yisifundo kuzulu amele ukuthi atshiyane lodlakela ngoba esetshenziswa zinkokhekheli emabandleni ezombusazwe, njalo umthetho uzabathola noma kanjani.
Umnumzana Japhet Dube oyisakhamuzi saseMbare laye utshengise ukusijabulela lesi sinqumo phezu kokuthathelwe kuka Kunaka, impahla,kuqalwa ngasemzini wakhe weMbare.
Wengeze uDube ethi okudanisayo yikuba kubotshwa laba abaphansi, ikanti zikhona izigelekeqe okuyizona umthetho kumele uzijezise ngoba kuyizo ezifundisa abasakhulayo laba umkhuba wokuqhuba imisebenzi yodlakela.
Isithunywa sedale yikhona sizayathatha impahla, esiyilobe phansi emzini kaKunaka, ngoMvulo.