Umantshi uCollet Ncube usegwebe umkhokheli webandla leCitizens Coalition for Change uMnu. Jameson Timba lowayengukhansila weHarare uMnu. Jaison Kautsa ukuba bavalelwe entilongweni okweminyika embili kulandela ukutholakala kwabo belecala lokuqoqa umhlangano owawungekho emthethweni lonyaka ngoNhlangula.
Kodwa uNcube wesule isigwebo lesi esithi akumelanga benze umhlangano ongekho emthethweni phakathi kweminyaka emihlanu elandelayo.
Inhlanganiso elwela ilungelo loluntu eyeZimbabwe Lawyers for Human Rights ibika ukuba abanye abatholakale belecala elifanayo abayisitshiyangalombili abangabesifazane bagqwetshwe ukuba behlale entilongweni okwenyanga ezilitshumi lane - 14 kodwa isigwebo lesi sibekwe eceleni njengalokhu okwenziwe kuTimba loKautsa.
Kulabanye njalo abasakhulayo ababotshwa loTimba abesulelwe izigwebo zabo ngumantshi othe bengaphindi futhi bedale icala elifanayo phakathi kweminyaka emihlanu ezayo.
Abantu laba bonke besebehlale eRemand Prison inyanga ezinhlanu. Babotshwa endlini kaTimba bethakazelela usuku lweDay of the African Child eHarare.