Empilweni, kwakuthi umuntu esinde engozini abe ngobonga amadlozi kumbe uMvelingqangi, kusiya ngokuthi ukholo lwakhe lugxile ngaphi.
Kodwa ukhona omunye ujaha weShangani obonga izinja zakhe ngemva kokuba zimncedise ukulwisana lengwe emdlithize isamdlithiza yamtshiya elaliswe esibhedlela.
UMehleli Ndlovu (25), wayethinta umhlambi wenkomo epulazini asebenza kulo, iDandasi Farm, eShangani ngeviki edluleyo kuze kuqhamuke ingwe eyahluthuna ithole emhlambini wakhe.
Izinja zakhe zilwisane lalingwe yabisitshiya umphako wayo ingasadlanga nkotshana yaqonda kuye kwaba yiphansiphezulu walwisana layo encedisana lezinja zakhe yaze yabaleka.
Kodwa ingwe le imtshiye elimele ezandleni lenyaweni. Umfanekiso ophume kuphephandaba lebulenjili, iNewZimbabwe uveza uNdlovu ebhanditshe izandla emanxebanxeba.
Okwamanje uyelatshwa kwesinye isibhedlela edolobheni lakoBulawayo. Ekhuluma leStudio 7 uNdlovu uthe ubonga izinja zakhe njalo uzazenzela idili ngokuzihlabela imbuzi.