Uhulumende weZimbabwe uthi akulanzondano ekhona phakathi kwakhe lohulumende weZambia kulandela amazwi kaMongameli Emmerson Mnangagwa awokuchothoza ubudlelwano beleMelika leleZambia.
UMnangagwa utshele uMongameli waseRussia uMnu Vladimir Putin ngeviki edluleyo ukuthi uhulumende weMelika uphathisa eleZambia leleMalawi ngemali yokuthuthukisa ezenotho lezomvikela etshiya iZimbabwe phandle ngoba efuna ukuyikhawulisa.
Ekhuluma ngemva komhlangano wedale labaphathintambo bakahulumende ngoLwesibili, umphathintambo obona ngokwethulwa kwemibiko uMnu Janfan Muswere utshele intathelizindaba ukuthi eleZimbabwe lidinga ukwakha ubungane lamazwe wonke, wathi njalo ubudlelwano beZimbabwe leZambia buqinile njengobamawele.
Uhulumende weleZambia, yena okhanya engaphathwanga kuhle ngamazwi kaMnangagwa, uthi uzakhulumisana lohulumende weZimbabwe ngaloludaba.
EleMelika lona liyawalandula amazwi kaMnangagwa lisithi lunengi usizo eselilunike iZimbabwe kusukela ithola uzibuse.
Ingcwethi kwezombusazwe njalo engumkhokheli wenhlanganiso emela abathengi eyeNational Consumer Rights Association uMnu Effie Dlela Ncube utshele iStudio 7 ukuthi akaboni amazwi kaMuswere eqeda ukungezwani okungaba kukhona phakathi kweZimbabwe leZambia.
Your browser doesn’t support HTML5
Udaba Lwamazwi kaMongameli Mnagagwa ngeZambia