Ngesikhathi kulungiselelwa usuku lwamhlaka 25 Mfumfu olukhethwe yiSouthern African Development Community njengelanga lokusola izijeziso zenotho ezetheswa inkokheli yebandla leZanu PF, kabavumelani abadabuka eZimbabwe abahlala kwele South Africa ngokuthi kambe ukuhlala kwabo emazweni kubangelwe yizijeziso zomnotho lezi yini kumbe yinkohlakalo lokwehluleka ukubusa kukahulumende.
Isikhulumeli sebandla leZanu pf kweleSouth Africa umnumnzana Kennedy Mandaza uthi lobanje besemukela ukuthi kulenkohlakalo uhulumende aphakathi kokulwisana layo eZimbabwe, izijeziso zomnotho zidlale indima enkulu ekuwiseni umnotho welizwe. Uthi yizo ezibangele ukuthi abantu babaleke bayegcwala kweleSouth Africa.
Umnumnzana Mandaza uthi amazwe asegcwele abeZimbabwe laba azithola esehlaselwa ludlakela lwexenophobia ngoba izizalwane zawo sezilwela ukuvikela imisebenzi yazo esithethwe ngabeZimbabwe laba.
“Izijeziso lezi yizo ezibangela ubunzima obuxotsha abantu ekhaya ngakho sithi kazesulwe.”
Kodwa umgcinisihlalo webandla leMDC Alliance kweleSouth Africa umnumnzana Trust Ndlovu uthi ukubaleka kwabantu elizweni besiyaminyana kwamanye amazwe kubangelwe yinkohlakalo yeziphathamandla zikahulumende weZanu pf eguqise ilizwe ngamadolo.
“Iqiniso yikuthi ilizwe libulewe yikutshontsha ngabantu abatshontshayo abatshontshela uhulumeni iziphathamandla zalaphaya ezikhokhelwa yiZanu zingaqambi amanga. Abantu babaleka kunje, babalekela indlala, ukuphathwa kabi, amalungelo abantu. Uma ungasuye muntu weZanu awukwazi ukuphumelela kuleliya lizwe.”
Ingcitshi kwezombusazwe umnumnzana Zenzo Moyo uthi liqiniso ukuthi izijeziso zomnotho ezethulelwe abathile eZimbabwe zilomthelela ongemuhle kuntuthuko yelizwe. Kodwake uthi akusilo qiniso lokuthi yizo eziwise umnotho welizwe ngoba zafakelwe bonalabo abawisa umnotho welizwe.
“Abantu beZimbabwe bagcwelenje emazweni wonke jikelele eSouth Africa laseBotswana abanengi babo hayi ngoba ngamasanctions. Yindlela ilizwe laseZimbabwe ebelibuswa ngakhona njalo elilokhu libuswa ngakhona lamanje. So amasanctions angaze akhitshwe laba bantu bazabe belokhu beqhubeka besiya kulawa mazwe ngoba kuyabe kungakalungiswa isiqokoqela senkinga ekhona eZimbabwe.”
Loba kunjalo umnumnzana Moyo uthi kuqondile ukuthi lezi zijeziso zesulwe.
“Akesibalalele la amasanctions akhitshwe sibone ukuthi ngokuya phambili bazasebenzisa siphi isizatho nxa sebesehluleka ukuthi balungise ilizwe ngoba amasanctions ayabe engasekho. Okwesibili kuyikuthi ngoba vele la amasanctions awabisi ibenefit enkulu kuma citizens.”
Ebuzwa yiStudio 7 ngomthelela wezijeziso zomnotho emazweni afana leleSouth Africa umeli weZimbabwe kweleSouth Africa umnumnzana David Hamadziripi uthe lumbuzo kufanele ubuzwe lawo mazwe hatshi ihofisi yakhe.
Uthe okwamanje usakhuluma labosowabo abamela amazwe eSADC kanye lohulumende weSouth Africa ukuze athole ukuthi nhlelo bani ezizabe zisenziwa ngamazwe atshiyeneyo ngalelilanga.
Isikhulumeli sikamphathintambo obona ngobudlelwano beSouth Africa lamanye amazwe umnumnzana Lunga Ngqengelele laye wenqabile ukuphawula ngodaba lomthelela wezijeziso lezi. Uthi umsebenzi wogatsha lwakhe ngowokwakha ubudlelwano obuhle lamanye amazwe kanti iSouth Africa leZimbabwe zilobudlelwano obuhle kakhulu.
Uthi selokhu iSADC yethula ukuthi kusolwe izijeziso zomnotho eZimbabwe umphathintambo wogatsha lolu unkosikazi Naledi Pandor uhleli njalonje esola izijeziso ezethulelwe iZimbabwe.
Mhlaka 18 Ngcwabakazi 2019, inhlanganiso yeSADC yamemezela ukuthi umhlaka 25 Mfumfu lilanga lokuthi amazwe onke angamalunga ale inhlanganiso ethule inhlelo, inkulumo lemikhankaso yokuthi kwesulwe izijeziso ezethulelwa iZimbabwe.
IMelika lenhlanganiso yomanyano wezizwe zezwekazi leEurope bethulela abantu abaphose bafike ikhulu izijeziso zomnotho eZimbabwe besetheswa umlandu wenkohlakalo. Abethulelwa izijeziso laba kabavunyelwa ukuya eMelika le Europe njalo abavunyelwa ukuqhuba ezamabhizimusi lamankampani akulawa mazwe.