Uhulumende we Zimbabwe usethethe isinqumo sokuthi kumele kuguqulwe ezinye iziqondiso zomthetho ezisekela uhlelo lokwabela abensundu amashares amankampani alabanini bakwamanye amazwe.
UMnu. James Maridadi, isikhulumeli senhloko kahulumende uMnu. Morgan Tsvangirai, utshele amaphephandaba ukuthi isinqumo lesi sithethwe emhlanganweni wedale labampathintambo ele Cabinet owenzelwe eHarare ngoLwesibili.
U Maridadi uthe iziqondiso ezilahlwe yiCabinet yilezo ezethulwe ngoMbimbitho nguMnu. Saviour Kasukuwere, umphathintambo wogatsha lukahulumende olubona ngezabatsha lokuthuthukisa inotho yabansundu.
Uphinde wathi njengoba lezo ziqondiso seziguqulwe, sokumele kubunjwe ezinye ezizasekela uhlelo lolu phansi komthetho munye owe Indigenization and Economic Empowerment Act.
Kungakenzakali lokhu, amankampani emazweni alamabhizimusi eZimbabwe abesedlela evalweni njengoba bekumele ngoLwesithathu athumezele ugatsha olubona ngohlelo lwe Indigenization imbiko yokuthi amenjani kuma shares awo.
Abakwaziyo ngokwenzakalayo bathi abaqondisi bamankampani amanengi angaphansi kwe Confederation of Zimbabwe Industries le Chamber of Mines enze imhlangano engapheliyo ngoLwesibili bekhonona ngohlelo lwe indigenization besithi kumele umthetho osekela loluhlelo uguqulwe.
Lokhu kwenzakale ngesikhathi uTsvangirai inhloko ka hulumende ethe uzabamba ngamandla uKasukuwere ukuthi aguqule imthetho esekele uhlelo lwe indigenization.
Umnu. Rejoice Ngwenya ingcwethi ecubungula ezenotho utshele uGibbs Dube we Studio 7 ukuthi nxa uKasukuwere ehlonipha uTsvangirai, uzaguqula umthetho osekela uhlelo lwe indigenization.
