Umphathintambo wogatsha lwendaba zasekhaya kweleSouth Africa useyengeze isikhathi samaZimbabwe Exemption Permit (ZEP) ngomnyaka ogcweleyo.
UMnumnzana Leon Schreiber namuhla wethule umbiko othi abadabuka eZimbabwe abalamaphepha la bazawasebenzisa kuze kuyefika umhlaka 28 Lwezi ngomnyaka ka2025. Isikhathi ebesiphiwe la mapermit besivele siphela namuhla.
USchreiber uthi lokhu ukwenzele ukuthi agcwalise isinqumo somthethwandaba weHigh Court ePretoria wona owathi ukusebenza kwala amapermit akufanelanga kumiswe kungakhulunywanga kuqala lezizalwane zeZimbabwe ukuze zikhulume ukuthi ukumiswa kwawo kuzaphazamisa kangakanani impilo zabo.
Ngales’isikhathi esengeziweyo, uhulumende uthi akufanelanga kube lophethe li permit obotshwayo kumbe ophindiselwa eZimbabwe ngesizatho sokuthi iphasipoti yakhe ikhombisa ukuthi ipermit yakhe seyaphelelwa yisikhathi.
Abalamapermit la bayavunyelwa njalo ukungena lokuphuma santando kweleSouth Africa kungelamgoqo. Akulamuntu okufanele abambe ngamandla abalamapermit la ukuthi bamuphe ubufakazi bencwadi ekhombisa ukuthi baselizweni ngokusemthethweni njengoba ubufakazi balokhu kuyilolugwalo olwethulwe ngumphathintambo ngokomthetho wesisekelo sombuso.
South Africa has extended Zimbabwe Exemption Permits to next year.
Izizalwane zeZimbabwe sezethule imibono etshiyeneyo ngodaba lwezokwengezwa kwesikhathi sama permit la. Umgcinisihlalo wenhlanganiso elwela amalungelo abesifazana beZimbabwe kweleSouth Africa eyeZim Imbokodo, uNkosazana Victress Mathuthu, uthi kuyabahlukumeza kakhulu ukuthi uhulumende uvula avale amapermit la ngesikhathi sakhe. Uthi abasakwazi okuyikho njengoba kwathiwa bafake izicelo zokungena kwamanye amapermit kodwa manje umphathintambo uthi khona esazokhulumisana lezizalwane zeZimbabwe njengokutsho komthethwandaba.
“Asisakwazi ukuthi siye emabhanga siyovula ama account.Awukwazi lokuthi loba ulencwadi zokutshayela uhambe uyezivuselela abavumi. Awukwazi lokuthi uthole incwadi zokutshayela ezintsha ngale i ZEP lama extension ayenziwayo. Yebo iyabongeka mpela kodwa ayisawenzi umsebenzi wayo.”
UMnumnzana Lance Mlilo, Umkhokheli wenhlanganiso elwela amalungelo ezizalwane zeZimbabwe kweleSouth Africa eyeProgressive Zimbabwe Foundation, uthi ukwengezwa kwesikhathi samapermit la kwenzeka ngesikhathi esihle lapho lezinga lokuzingelwa kwabokuza abangelamaphepha kuvele selikhwelile.
“Siyakhumbula ukuthi abanye besebevalelwe amabank accounts abo. Abanye besebesesaba ukuhamba ezitaladeni. Ngokunjalo ngicabanga ukuthi bazothola lokukhululeka ukuthi bahambe baye emakhaya. Abanye besebesesaba ukuthi mhlawumbe bangaphuma bengabuya sebephiwa izinsuku ezingeke zibenelise ukuthi bakhone ukuya emsebenzini.”
UMnumnzana Ngqabutho Mabhena, umgcinisihlalo wenhlanganiso yeZimbabwe Community in South Africa, uthi bayemukela ukwengezwa kwesikhathi samapermit la njalo kuyabajabulisa ukuthi uSchreiber uthi uzalandela okwatshiwo ngumthethwandaba engakenzi isinqumo ngesiphetho sala mapermit.
“Abantu abanengi besebephithizela becabanga ukuthi kuyavalwa lamhlanje mhlaka 29 November 2024. Kodwa lokhu sekwenze ukuthi abantu sebengaqala ukukhululeka. Abanye futhi sinanzelela ukuthi bebengelayo imali ngoba abantu belungiselela ukuthi baye emakhaya njengoba kusiyavalwa ngenyanga elandelayo abantu besiya kukhisimusi.”
Kodwa-ke ezinye izizalwane zakweleSouth Africa azivumelani lesinqumo sikahulumende sokwengeza isikhathi samapermit la. Umkhokheli wenhlanganiso ye Operation Dudula unkosazana Zandile Dabula uthi lubephule inhliziyo ugatsha lwendaba zasekhaya.
“Thina singuOperation Dudula sidumele kakhulu nge extension yama ZEP permit.”
We were expecting ukuthi bazawakhansela because even the unemployment rate if very too high la eSouth Africa and imisebenzi eminingi ithathwe yibo abantu bokuhamba. So, we are definitely going to fight back. If kuzomele siye ecourt, then we will do so. Sizobe sixoxa ne legal team yethu and check ukuthi what are the possibilities asingazenza.
Kulezizalwane zeZimbabwe eziphose zifike inkulungwane ezingamakhulu amabili - 178,000 ezilamapermit eZEP. Inengi labo okwakhathesi liphakathi kokufaka izicelo zamanye amapermit okuyinto abathi sebezayenza amaphapho ehleli phansi ngemva kokwengezwa kwesikhathi samapermiti la.
SEE ALSO:
Udaba Esilwethulelwe NguTshuso Khumalo