Uhulumende lonyaka wengeze inani labongi abazafundela umsebenzi ezikolo zikahulumende ezilitshumi lasitshiyagalolunye eziselizweni.
Ugatsha lwezempilakahle luthi selibhalise izifundi ezingamakhulu phose ayisithupha - 565 kuzifundo eziqale kuyonalinyanga kaNkwenkwezi, inani leli likhuphuke lisuka kwabangamakhulu phose amane - 368.
Izikolo zabongi ezinengi zithatha izifundi kathathu ngomnyaka. Ukwengeza inani leli kwenziwa ngenhloso yokuvala izikhenxe ezatshiywa ngabongi abatshiya umsebenzi besiyadinga amadlelo kwamanye amazwe afana lebhilithani.
Isikhulumeli sogatsha lwezempilakahle uMnu Donald Mujiri utshele iStudio7 ukuthi ukwengezelela inani leli akusoze kuphazamise ukuzinza kwezifundo zabongi lanxa engachazanga ukuthi uhulumende uthatha manyathelo bani awokukhuthaza izisebenzi zogatsha lwezempilakalahle ukuthi zingabaleki zisiyadinga imisebenzi kwamanye amazwe.
Udokotela, uSikhwicamfundo Elopy Sibanda utshele iStudio7 ukuthi iholo labongi eliphansi yilo elibangela ukuthi abanengi baphume elizweni njalo nxa lingalungisiswanga balakho ukuqhubekela phambili bephuma elizweni.
SEE ALSO: Ingxoxo loSikhwicamfundo Elopy Sibanda.