Uhulumende weZimbabwe wehlulekile ukwakha okupheleleyo izakhiwo ezawiwa ngokuthi ngama presidential villas obekumele kuhlale inkokheli yomanyano weSouthern African Development Community (SADC) ezangena umhlangano omkhulu kusasa eHarare. Akwaziwa ukuba kuzakwenziwani ngezakhiwo lezi ezise Mt. Hamden.
Amaphephandaba ambalwa eZimbabwe abika ukuba kwehlule ukuthi ilizwe lakhe okupheleleyo izakhiwo lezi ezifika phose amatshumi amabili – 18.
Uhulumende kaMongameli Emmerson Mnangagwa walile ukukhuluma ngodaba lolu njalo lokuthi kwasetshenziswa imali enganani ukuzakha. Inkokheli yeSADC isizahlaliswa emawoteleni agoqela iMeikles, Rainbow leMonomotapa.
Abanye babo sebefikile eHarare loba nje kungaziwa ukuba uMongameli Hakainde Hichilema uzahamba emhlanganweni lo kumbe hatshi. Ingcwethi kwezombusazwe zithi kuyethusa okwehlele eleZimbabwe elehluleke ukwakha ama-presidential villas.
Infrastructural transformation in Harare
Ubambe owangaphansi uMnu. Ephraim Sibindi ofundisa ekolitshini yeUniversity of Zimbabwe.
“Kuyamangalisa ukuba kaba lomsindo ongaka besithi uhulumende uyalungisisa izakhiwo lezi kodwa kuze kube namhlanje akula okubambekayo, kutsh ukuba bakhona bangenzanga umsebenzi wabo.”
Ezinye njalo ingcwethi kwezombusazwe lezomnotho zithi liyazehlulekela eleZimbabwe elitshaphaza imali kazulu. Abaphathintambo bakahulumende ababona ngokwakhiwa kwama presidential villas abagoqela uMnu. Amos Marawa balile ukukhuluma ngawo.
Harare traffic signs improved
Loba kunjalo, eleZimbabwe lenelise ukulungisa imigwaqo lokunye eHarare laxotsha abathengisa impahla emigwaweni enzikini yedolobho leli. Kulabanye abancoma okwenziwe nguhulumende. Omunye wabo nguNkosikazi Nomvelo Dube.
“Uhulumende wenze kuhle ngokulungisa imigwaqo ekade ingasahambeki, siyabonga ukuba ukuza kweSADC sokwenze ukuba idolobho libukeke.’’
Omunye wabakhala ngokuxotshwa emigwaqweni nguMnu. Tavengwa Siziba.
“Thina sesiphilela evalweni ngoba siyagijinjiswa zikhathi zonke. Kunje sebengixotshile ndawonye labanye lapho akade ngithengisela khona, kubi sibili.’’
Okhulumela uhulumende ngesikhathi somhlangano weSADC, uMnu. Richard Mahomva, uthi kuhle abakwenzayo ngoba indawo zonke elizweni zibukhazikhazi.
Harare lights at long last
“Uhulumende uselungise okunengi kakhulu njalo okwenzakalayo yikuba silandela umthetho njalo sisebenzisa imali yethu yakuleli labantu abakhayo bengabekwaleli. Akulandawo ezasala emuva.”
Kuqhutshwe umhlangano wezomvikela lezombusazwe oweTroika ngoLwesihlanu eHarare njalo kukhangelelwe ukuba omongameli abamazwe agoqela eleMalazi, Tanzania, Namibia, Botswana, Angola lamanye bazakuthi gwaqa kusasa emhlanganweni omkhulu oweSADC Summit, ozahlolisisa okwenzakala emhlubulweni wezansi yezwekazi leAfrica.
Kukhanya engani inkokheli le kayisoze ikhulume ngodaba lokubotshwa kwabaphikisayo labalwela ilungelo loluntu eZimbabwe.