Abaqondisi bamankampani koBulawayo akade bemelele ukuthola imali yokuvuselela amankampani abhidlikayo kuhlelo lukahulumende lwe Distressed and Marginalized Areas Fund bathi kuyadanisa ukuzwa ukuthi uhulumende useyehlulekile ukukhipha eyinye yemali le ukwenzela ukuthi kubunjwe isikhwama sokukweledisa esikhangelwe yi Central African Building Society (CABS).
Abaqondisi laba bathi kuzwisa usizi ukuthi uhulumende wehluleke kusukela ngomfumfu nyakenye ukuthi afake kulesisikhwama izigidi ezingamatshumi amabili amadollar eMelika njengalokho okwenziwe yinkampani ye Old Mutual Insuarance esifake imali efanayo ebhanga le CABS.
Isikhwama lesi akade kumele sibe lezigidi ezingamatshumi amane amadollar eMelika kubikwa singakabunjwa okusemthethweni.
Ibhanga le CABS lithi izikwelede ezitholwa ngamankampani ebhanga layo zitholakala njengenhlalayenza hatshi esikhwameni sohlelo lolu olwalukhangelelwe ukuthi luncede amankampani athwele nzima koBulawayo.
Abaqondisi abambalwa bamankampani koBulawayo kubikwa lamuhla benze umhlangano lapho abathethe isinqumo sokuthi sokumele bakhulumisane leziphathamandla zikahulumende ngodaba lwezikwelede ezinikwa libhanga le cabs olungakhanyiyo ukuthi lwenziwa njani.
Umnu. Bulisani Ncube umqondisi wenhlanganiso yabo somabhizimusi iZimbabwe National Chamber of Commerce ko Bulawayo uthi uhulumende utshengisela ukuthi kafuni ukuthuthukisa inotho kazulu kwele maNdebeleni.
