UMongameli Robert Mugabe uthi amankampani emazweni angafuni ukwabela uzulu amashares ngaphansi kohlelo lweIndigenization kumele abuyele lapho avela khona ngoba elakho ukuthathwa nguhulumende.
Ekhuluma eCollen Bawn esabelweni se Matabeleland South ngoLwesihlanu lapho asungule khona uhlelo lwe Gwanda Community Ownership Share Trust, uMongameli Mugabe uthe kasoze avumele ukuthi amankampani la angalandeli iziqondiso zohlelo lolu.
Uthe uzulu udla ingqweqwe zomlomo ngesikhathi amankampani emazweni ethola inzuzo emangalisayo ekwembeni okutshiyeneyo kanye lokulungisa impahla.
Uthe uhulumende ufuna ukuthi lokhu konke kuguqulwe ngokuthi amankampani la abele uzulu amashares ayisilinganiso sokungamatshumi amahlanu lanye ekhulwini – 51%.
IGwanda Community Share Ownership Trust elezigidi ezilitshumi zamadollar eMelika – $10 million ibunjwe ngamankampani ezemigodi angamatshumi amabili agoqela iBlanket Mine, Jersey Mine le Fazik Mine.
Omunye walabo okhethe ukubizwa ngokuthi nguMnu. Sibanda obe khona kusungulwa loluhlelo uthe uzulu bekukhanya engani ubethabile ngokwenzakalayo.
Umnu. Luke Mathe isakhamuzi seKafusi esikade sibukele kusungulwa uhlelo lolu lwe Indigenization uthi uzulu uyajabula ngokwenziwa nguMongameli Mugabe.
Kodwa-ke uMnu. Tapiwa Mashakada umphathintambo wezokuguqula inotho yelizwe uthe okukhulunywe nguMongameli Mugabe kwethusa osomabhizimusi bemazweni abafuna ukuvula amafekithali kwele Zimbabwe.
